ب گوژمێ پترى هه‌شت ملیار دیناران به‌رێ بنیاتى بۆ ژماره‌كا پرۆژان ل ئامێدیێ هاته دانان
دهۆك-KDP.info- سكرتێرێ رۆژنامه‌ڤانى یێ پارێزگارێ دهۆكێ دیار كر كو ژپێخه‌مه‌ت خزمه‌ته‌كرنا وه‌لاتیێن ده‌ڤه‌رێن جوداجودا یێن پارێزگه‌ها دهۆكێ بۆ وێ چه‌ندێ بێ به‌هر نه‌بن ژ پرۆژێن خزمه‌تگۆزارى یێن كو ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ دهێنه بجهئینان، ئه‌ڤرۆ رۆژا پێنجشه‌مبى 12/1/2023 پ.د.عه‌لى ته‌ته‌ر، پارێزگارێ دهۆكێ سه‌ره‌دانا قه‌زا ئامێدیێ كر و ب گوژمێ پترى هه‌شت ملیار دیناران به‌رێ بنیاتى بۆ ژماره‌كا پرۆژان ل قه‌زا ناڤهاتى دانا و ژماره‌كا دى یا پرۆژان یێن كو ژ قووناغا بجهئینانێ ب دووماهى هاتین ڤه‌كرن.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو كاروانێ ئاڤه‌دانیێ ل هه‌مى ده‌ڤه‌رێن پارێزگه‌ها دهۆكێ بێ جوداهى یێ به‌رده‌وامه و به‌رده‌وام پرۆژێن خزمه‌تگۆزارى دهێنه بجهئینان و ڤه‌كرن و ئه‌ڤرۆ ژى پارێزگارێ دهۆكێ به‌رێ بنیاتى ب گوژمێ هه‌شت ملیار و 859 ملیۆن و 386 هزار و 134 دیناران بۆ ژماره‌یه‌كا پرۆژێن نوى یێن خزمه‌تگۆزارى ل سنوورێ قه‌زا ئامێدیێ دانا و د هه‌مان ده‌م دا ژماره‌كا پرۆژێن نوى یێن خزمه‌تگۆزارى یێن كو كاركرن تێدا ب دووماهى هاتى ڤه‌كرن و ئێخستنه د خزمه‌تا خه‌لكێ ده‌ڤه‌رێ دا و گۆت: "ژ وان پرۆژێن ئه‌ڤرۆ به‌رێ بنیاتى بۆ هاتیه دانان، چێكرنا رێیێن ناڤخۆ ل گوندێ سه‌رگه‌لێ و كه‌ڤنه مژێ و شێخ پیراموس و پرۆژێ گه‌هاندنا هێلا كاره‌بێ بۆ تاخێ ئازادى و تاخێن جوداجودا ل سه‌نته‌رێ ناحیا دێره‌لۆكێ و گوندێ هاریكا و فیده‌رێن به‌رده‌وام بۆ بنگه‌هێ ساخله‌میا ناحیا دێره‌لۆكێ و فه‌رمانگه‌ها كارتا نشتیمانى ل ناحیا ناڤهاتى".
ناڤهاتى خویا كر كو د هه‌مان ده‌م دا به‌رێ بنیاتى بۆ پرۆژێ سه‌خبێركرنا رێیێن ناڤخۆ ل تاخێ شه‌هیدان یێ ناحیا دێره‌لۆكێ ب درێژاهیا 2.717كم و پرۆژێ ئاڤاكرنا قوتابخانا 18 رێزى ل سێریێ و پرۆژێ قێركرن و كونكریتكرنا رێیێن ناڤخۆ ل ناحیا شێلادزێ و پرۆژێ دابینكرنا فلته‌را بۆ پرۆژێ ستراتیژى ل ناحیا دێره‌لۆكێ بۆ گه‌هاندنا ئاڤێ بۆ عمبارا چار هزار مه‌ترێن سێجا ل تاخێ گۆلان و سه‌خبێركرنا تورا ئاڤێ ل تاخێن ناحیا شێلادزێ و پرۆژێ ده‌رخستنا فیده‌رێن نوى 11KV ژ وێستگه‌ها موبایل 25MVA ل سیریێ و تمامكرنا فیده‌رێ 33 KV ژ وێستگه‌ها موبایل ل سیریێ هاته‌دانان و گۆت: "ئه‌و پرۆژێن ئه‌ڤرۆ ل قه‌زا ئامێدیێ به‌رێ بنیاتى بۆ ژ لایێ پارێزگارێ دهۆكێ ڤه هاتیه دانان د قۆناغێن جوداجودا یێن بجهئینانێ دا نه كو كار د ڤان پرۆژان دا ب رێژێن جودا ژ 3% هه‌تا 48% هاتیه ئه‌نجامدان".
سكرتێرێ رۆژنامه‌ڤانى یێ پارێزگارێ دهۆكێ ئاشكرا كر كو پارێزگارێ دهۆكێ د چارچۆڤێ سه‌ره‌دانا خوه یا قه‌زا ئامێدیێ دا دووپاتى ل وێ چه‌ندێ كر كو دێ هه‌مى بزاڤ هێنه‌كرن گرنگیه‌كا زێده‌تر ب ده‌رگه‌هێ سنوورى یێ سه‌رزێرى بهێته‌دان داكو بۆ مه‌ره‌مێن بازرگانى ژى بهێته بكارئینانان و ببیته ئه‌گه‌ره‌ك ده‌لیڤێن كارى یێن زێده‌تر ل ڤێ ده‌ڤه‌رێ په‌یداببن و خه‌لك ب شێوه‌یه‌كێ گشتى یێ مفاداربیت، ئه‌ڤه دده‌مه‌كى دایه نوكه كار ل سه‌ر وێ چه‌ندێ دهێته‌كرن تونێلا چیایێ مه‌تین بهێته‌چێكرن كو به‌رى نوكه ئه‌ڤ پرۆژه ب گوژمێ 43 ملیار دیناران یێ هاتیه راگه‌هاندن و ب تمامبوونا ڤى پرۆژه‌یى دێ ئاسانكاریه‌كا زێده‌تر ل ده‌رگه‌هێ ناڤهاتى هێته‌كرن.
رێوار محه‌مه‌د ره‌شید
