به‌رێ بنیاتى بۆ ژماره‌كا پرۆژان ل سێمێلێ هاته دانان
دهۆك –KDP.info- سكرتێرێ رۆژنامه‌ڤانى یێ پارێزگارێ دهۆكێ دیار كر كو د به‌رده‌وامیا چێكرن و ڤه‌كرنا پرۆژێن نوى یێن خزمه‌تگۆزارى دا ل ده‌ڤه‌رێن جوداجودا یێن پارێزگه‌ها دهۆكێ (پ.د.عه‌لى ته‌ته‌ر) پارێزگارێ دهۆكێ، ئه‌ڤرۆ رۆژا چارشه‌مبى 11/1/2023 به‌رێ بنیاتى ب كوژمێ پترى پێنج ملیار دیناران بۆ ژماره‌كا پرۆژان ل قه‌زا سێمێلێ دانا.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ بۆ ماڵپه‌رێ فه‌رمیێ پارى دیموكراتى كوردستان دیار كر كو ب مه‌ره‌ما گه‌هاندنا خزمه‌تگۆزاریێن زیده‌تر بۆ وه‌لاتیان ئه‌ڤرۆ پارێزگارێ دهۆكێ به‌رێ بنیاتى ب كوژمێ پێنج ملیار و 696 ملیۆن و حه‌فت هزار دیناران بۆ ژماره‌كا پرۆژێن خزمه‌تگۆزارى د بوارێن جوداجودا دا ل قه‌زا سێمێلێ یا سه‌ر ب پارێزگه‌ها دهۆكێ ڤه دانا.
ناڤهاتى ئاماژه دا وێ چه‌ندێ كو ئه‌و پرۆژێن ئه‌ڤرۆ ل قه‌زا سێمێلێ به‌رێ بنیاتى ژ لایێ پارێزگارێ دهۆكێ ڤه بۆ هاتیه دانان، پرۆژێ سه‌خبێركرنا رێیێن (دارێ بوسریان ب درێژاهیا هه‌شت كیلومه‌تران، دارێ گه‌رماڤا محه‌مه‌د ئاغا 2.5 كم، گرێ گه‌ورێ ب درێژاهیا چار كیلومه‌تران) ب كوژمێ ملیاره‌ك و 370 ملیۆن و 505 هزار دینارن ل سنوورێ ناحیا باتێلێ دێ هێته بجهئینان، هه‌روه‌سا پرۆژێ چێكرنا سایده‌كى ژ جادا 30 مه‌ترى ل دوریانا جه‌ركى و رێیێن ناڤخۆ ل تاخێ میتان و رێیێن ناڤخۆ ل خانكێ و مسێریكێ ب كوژمێ ملیاره‌ك و 849 ملیۆن و 11 هزار دیناران دێ هێته بجهئینان.
سكرتێرێ رۆژنامه‌ڤانى یێ پارێزگارێ دهۆكێ خویا كر كو هه‌ر د چارچۆڤێ وان پرۆژان دا یێن كو ئه‌ڤرۆ ل قه‌زا سێمێلێ به‌رێ بنیاتى بۆ ژ لایێ پارێزگارێ دهۆكێ ڤه هاتیه دانان، پرۆژێ گه‌هاندنا كاره‌بێ بۆ تاخێن نوى یێن ێمێلێ و ده‌وروبه‌ران دگه‌ل دانانا پێنج گوهۆڕكێن ئوڤرلود و كێشانا فیده‌ره‌كى بۆ كومه‌لگه‌ها دومیز ب كوژمێ 622 ملیون دیناران دێ هێته بجهئینان، هه‌روه‌سا پرۆژێ چێكرنا رێیێن ناڤخۆ ل گوندێ سێجێ ب درێژاهیا دو كیلومه‌تران و یێن تاخێن شه‌هیدان و ئازادى و سایده‌كێ خزمه‌تگۆزارى ل ئه‌نده‌رپاسا سێمێلێ ب كوژمێ ملیاره‌ك و 854 ملیون و 491 هزار دینارن دێ هێته بجهئینان و گۆت: "ژ بلى وان پرۆژێن ئه‌ڤرۆ به‌رێ بنیاتى بۆ ل قه‌زا سێمێلێ هاتیه‌دانان، نوكه چه‌ندین پرۆژێن دى یێن خزمه‌تگۆزارى ل قه‌زا ناڤهاتى و قه‌زایێن دى یێن پارێزگه‌ها دهۆكێ د قووناغا بجهئینانێ دانه و ل ده‌مه‌كێ نێزیك دێ ب دووماهى هێن و كه‌ڤنه د خزمه‌تا وه‌لاتیان دا".
رێوار محه‌مه‌د ره‌شید
