دەست ب چێکرنا جووت سایدێ باتیفا هاتەکرن
دهۆک -KDP.info- بەرپرسێ ڕاگەهاندنێ ل رێڤەبەریا گشتی یا باژێرڤانیان ل پارێزگەها دهۆکێ ئاشکرا کر کو ب کوژمێ پتری سێ ملیار دیناران دەست ب چێکرنا پرۆژێ جووت سایدێ قەزا باتیفا ل سنوورێ ئیدارا سەربەخۆ یا زاخۆ هاتەکرن.
ئەمیر ئەترووشی، بەرپرسێ ڕاگەهاندنێ ل رێڤەبەریا گشتی یا باژێرڤانیان ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو د بەردەوامیا چێکرنا پرۆژێن نوی یێن خزمەتگۆزاری دا یێن کو ل سەر دەمێ کابینا نەهێ یا حکومەتا هەرێما کوردستانێ دهێنە بجهئینان، دەست ب پرۆژێ چێکرنا جادا جووت ساید ل قەزا باتیفا ل سنوورێ ئیدارا سەربەخۆ یا زاخۆ ب درێژاهیا 1,7 کم هاتەکرن.
ناڤهاتی ئاماژە دا وێ چەندێ کو ئەڤ پرۆژە ب کوژمێ سێ ملیار و 425 ملیۆن دیناران ژ لایێ کۆمپانیەکێ ڤە دهێتە بجهئینان و دەمێ ب دووماهی هاتنا ڤی پرۆژەی 180 رۆژن و گۆت: "ئەڤ پرۆژە دێ بیتە ئەگەرەک کو هاتنوچوونا وەلاتیان ئاسانتر لێ بهێت، هەروەسا روودانێن هاتنوچوونێ ژی کێمتر لێ بهێن، بەلێ ل دەمێ کار د ڤی پرۆژەی دا دهێتەکرن داخوازێ ژ شۆفێران دکەین د هاریکاربن و لەزاتیێ کێم بکەن داکو گیان ب سلامەت بن".
بەرپرسێ ڕاگەهاندنێ ل رێڤەبەریا گشتی یا باژێرڤانیان ل پارێزگەها دهۆکێ خویا کر کو ژ بلی بجهئینانا ڤی پرۆژەی، نوکە چەندین پرۆژێن دی یێن خزمەتگۆزاری د بوارێن جودا جودا دا ل هەمان قەزا د قووناغێن بجهئینانێ دانە و ل دەمەکێ نێزیک دێ ئەو پرۆژە ژی کەڤنە د خزمەتا خەلکێ دەڤەرێ دا.
رێوار محەمەد رەشید
