چیا ئەمین: پرۆژێ کورنیشێ زاخۆ ل دەوروبەرێن خابیری دێ هێتە درێژکرن

دهۆک -KDP.info- رێڤەبەرێ گەشتوگۆزارێ ل ئیدارا سەربەخۆ یا زاخۆ دیار کر کو ل دەمەکێ نێزیک دێ دەست ب پرۆژێ کورنیشێ زاخۆ ل دەوروبەرێن خابیری هێتەکرن، سەرەرایی ڤێ چەندێ نوکە دەست ب بەرفرهکرنا مەیدانا پرا دەلال ژی هاتیەکرن.

چیا ئەمین، رێڤەبەرێ رێڤەبەریا گشتی یا گەشتوگۆزارێ ل ئیدارا سەربەخۆ یا زاخۆ بۆ ماڵپەرێ فەرمیێ پارتی دیموکراتی کوردستان دیار کر کو د بەردەوامیا چێکرنا پرۆژێن نوی یێن گەشتیاری دا یێن کو ل سەر دەمێ کابینا نەهێ یا حکومەتا هەرێما کوردستانێ ل سنوورێ ئیدارا سەربەخۆ یا زاخۆ دهێنە ئەنجامدان، ل دەمەکێ نێزیک دێ دەست ب پرۆژێ کورنیشێ زاخۆ ل دەوروبەرێن خابیری هێتەکرن و گۆت: "ئەڤ کورنیشە دێ هێتە درێژکرن و ب سێ قووناغان دێ ب دووماهی هێت، قووناغا ئێکێ دێ ژ پرا دەلال دەستپێکەت و یا دووێ دێ هەتا بانکا خابوور بەردەوامی پێ هێتەدان و قووناغا سێیێ ژی دێ هەتا دووماهیا بێدارێ هێتە درێژکرن و هندی خابیر د ناڤ سەنتەرێ باژێڕێ زاخۆ دا ببووریت ل سەر ئەرکێ سەرۆکێ حکومەتا هەرێما کوردستانێ دێ بەردەوامی ب ڤی پرۆژەیی هێتەدان".

ناڤهاتی ئاماژە دا وێ چەندێ کو پرۆژێ کورنیشێ زاخۆ هەر د چارچاڤۆڤێ پرۆژێ گەشتیاری یێ بەنداڤێن ژێر ئاڤە د ناڤ خابیری زاخۆ دا کو نوکە چار بەنداڤ ب دووماهی هاتینە و کار ژ لایێ کۆمپانیا جێبەجێکار ڤە د بەنداڤا پێنجێ و دووماهیێ دا یێ بەردەوامە کو ئەڤ پرۆژە ب کوژمێ سێ ملیار و 172 ملیار و 281 هزار دیناران د قووناغا بجهئینانێ دایە و گۆت: "ب بڕیارا سەرپەرشتێ ئیدارا سەربەخۆ یا زاخۆ ژ پێخەمەت خزمەتکرنا وەلاتی و گەشتیارێن سەرەدانا زاخۆ دکەن ئەڤرۆ رۆژا دووشەمبی 9/1/2023 دەست ب بەرفرەهکرنا مەیدانا پرا دەلال ل زاخۆ هاتەکرن بۆ وێ چەندێ ل پاشەرۆژێ کار و چالاکیێن مەزنتر ژ ئاهەنگێن شەڤا سەرێ سالا نوی یا زایینی ل وی جهی بهێنە ئەنجامدان".

رێوار محەمەد رەشید