ئەنجومەنی باڵای فتوا: هەموو زێدەڕۆییەک لە بەکارهێنانی ئاودا حەرامە
هەولێر-KDP.info- دوای ئەوەی بەڕێوەبەرایەتی گشتی سەرچاوەکانی ئاو داوای لە یەکێتی زانایانی ئاینی ئیسلامی کوردستان، مەکتبی تەنفیزی کرد کە لەبارەی بیری قاچاغ و خراپی بەکارهێنانی ئاو فتوایەک دەربکرێ، ئەنجومەنی باڵای فتوا "حوکمی ئیسراف و فێڵکردن لە ئاو و هەڵکەندنی بیری نایاسایی" بڵاو کردەوە:
یەکەم، بەپێی دەقەکانی شەریعەت هەموو زێدەڕۆییەک لە بەکارهێنانی ئاودا حەرامە.
دووەم، هەڵکەندنی بیری نایاسایی کارێکی نادروستە، هەموو ئەو کەسانەی هاوکار دەبن لە لێدانیدا گوناهبار دەبن، هەروەها پێدان و وەرگرتنی بەرتیلیش بۆی لە گوناهە گەورەکان هەژمار دەکرێ.
سێهەم، تەجاوزکردن بۆ سەر پڕۆژەکانی ئاو بە هەموو شێوەکانیەوە دەچێتە خانەی غەشەوە و حەرامە.
چوارەم، داوا لە لایەنی پەیوەندیدار لە حکوومەتی هەرێمی کوردستان دەکەین کە پلانی گونجاو و بە پەلە دابنێن و کاری پێویست ئەنجام بدەن بۆ چارەسەرکردنی ئەم قەیرانی ئاوە.
ڕامان وریا
