پارێزگارێ دهۆكێ: ب كۆژمێ پترى 77 ملیار دیناران پرۆژه ل دهۆكێ دهێنه بجهئینان
دهۆك–KDP.info- پ.د.عه‌لى ته‌ته‌ر، پارێزگارێ دهۆكێ ئه‌ڤرۆ رۆژا دووشه‌مبى 2/1/2023 د سه‌ره‌دانه‌كا مه‌یدانى دا بۆ پرۆژێن خزمه‌تگۆزارى یێن كو د ناڤ سه‌نته‌رێ باژێرێ دهۆكێ دا دهێنه ئه‌نجامدان دیار كر كو نوكه ب كۆژمێ پترى 77 ملیار دیناران پرۆژێن خزمه‌تگۆزارى ل سنوورێ قه‌زا دهۆكێ د قووناغا بجهئینانێ دانه.
پ.د.عه‌لى ته‌ته‌ر پارێزگارێ دهۆكێ د كۆنگره‌كێ رۆژنامه‌ڤانى دا دیار كر كو د به‌رده‌وامیا بجهئینانا پرۆژێن نوى یێن خزمه‌تگۆزارى دا یێن كو ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ ل ده‌ڤه‌رێن جودا یێن پارێزگه‌ها دهۆكێ دهێنه بجهئینان، نوكه ب كۆژمێ پترى 77 ملیار دیناران پرۆژێن خزمه‌تگۆزارى یێن جوراوجور ل سنوورێ قه‌زا دهۆكێ د قووناغا بجهئینانێ دانه كو به‌هرا پتریا ڤان پرۆژان ژى د ناڤ سه‌نته‌رێ باژێڕێ دهۆكێ دانه، ژ وان ژى هنده‌ك پرۆژێن جادانه و ئه‌و جاده دێ بنه ئه‌گه‌رێ وێ چه‌ندێ كو قه‌ره‌بالغا د ناڤ جادێن دى یێن دهۆكێ دا هه‌تا راده‌یه‌كى كێم ببیت، سه‌ره‌رایى ڤێ چه‌ندێ مه پشتبه‌ستنا خوه ئێخستیه ل سه‌ر ڤه‌كرن و قێركرنا كۆلانێن تاخێن نوى یێن دهۆكێ، زێده‌بارى ڤێ چه‌ندێ چه‌ندین پرۆژێن د بوارێ په‌روه‌ردێ و كاره‌ب و ئاڤ و هتد.....د قووناغا بجهئینانێ دانه و چێكرنا ڤان پرۆژێن خزمه‌تگۆزارى ل پارێزگه‌ها دهۆكێ دێ یا به‌رده‌وام بیت و ئه‌ڤرۆ ژى مه ژماره‌كا پرۆژێن خزمه‌تگۆزارى ئیمزاكرینه.
پارێزگارێ دهۆكێ ئاشكرا كر كو ل رۆژێن بهێت دێ ژماره‌كا پرۆژێن دى یێن خزمه‌تگۆزارى ل هه‌مى ده‌ڤه‌رێن پارێزگه‌ها دهۆكێ بێ جوداهى ره‌وانه‌یى بجهئینانێ هێنه‌كرن و گۆت: "د پلان دایه ئه‌ڤ ساله به‌رێ بنیاتى بۆ ئاڤاكرنا نه‌خۆشحانا په‌نجه‌شێرێ ل پارێزگه‌ها دهۆكێ بهێته‌دانان و ره‌زامه‌ندى ژى بۆ بجهئینانا ڤى پرۆژه‌ی هاتیه وه‌رگرتن و هه‌مى بزاڤ یێ بۆ تمامكرنا نه‌خۆشخانا نوى یا ته‌نگاڤیان ژى دهێنه‌كرن، هه‌روه‌سا ل رۆژێن داهاتى دێ پیشه‌سازیا ترۆمبێلان ل تاخێ به‌رۆشكێ بۆ جهێ وێ یێ نوى ل ئالۆكا هێته ڤه‌گوهاستن و ل جهێ وێ یێ كه‌ڤن دێ پاركه‌كا گشتى هێته چێكرن".
رێوار محه‌مه‌د ره‌شید
