د رۆژێن بهێنڤه‌دانا دا 190 كور و 224 كچ ژ دایكبووینه
دهۆك–KDP.info- رێڤه‌به‌ریا گشتى یا ساخله‌میێ ل پارێزگه‌ها دهۆكێ ئه‌ڤرۆ رۆژا دووشه‌مبى 2/1/2022 ئامارێن رۆژێن بهێنڤه‌دانا سه‌رێ سالا نوى یا زایینى 2023 یێن كو ل ده‌زگه‌هێن ساخله‌میا پارێزگه‌ها دهۆكێ هاتینه تۆماركرن ڕاگه‌هاندن.
حه‌مزه ره‌زیكى، به‌رپرسێ ڕاگه‌هاندنا رێڤه‌به‌ریا گشتى یا ساخله‌میێ ل پارێزگه‌ها دهۆكێ د كۆنگره‌كێ رۆژنامه‌ڤانى دا ئاشكرا كر كو د رۆژێن بهێنڤه‌دانا سه‌رێ سالا نوى یا زایینى دا 414 زارۆك ژ دایكبووینه ژوان 190 كور و 224 كچن، هه‌روه‌سا 10 هزار و 284 كه‌سان سه‌ره‌دانا پشكێن ته‌نگاڤیان كریه و هزار و 549 نه‌خۆش ل ده‌زگه‌هێن ساخله‌میێ هاتینه نڤاندن، د هه‌مان ده‌م دا 204 نشته‌رگه‌رى هاتینه ئه‌نجامدان و گۆت: "د رۆژێن بهێنه‌ڤه‌دانا سه‌رێ سالا نوى دا شه‌ش كه‌س بۆ نۆشداریا داد هاتینه ره‌وانه‌كرن كو سێ كه‌سان ژ ئه‌گه‌رێ سۆتنێ و كه‌سه‌كى ژ ئه‌گه‌رێ روودانا ترۆمبێلێ و كه‌سه‌كى ژ ئه‌گه‌رێ خوه‌خه‌ندقاندنێ و كه‌سه‌كێ دى ژى ژ نیشكه‌كێ ڤه گیانێ خوه ژده‌ستدابوون، د هه‌مان ده‌م دا 24 كه‌سێن دى ژ ئه‌گه‌رێ جه‌لتێن دلى و مێشكى و نه‌خۆشیێن دومدرێژ چووینه به‌ر دلۆڤانیا خودێ".
ناڤهاتى ئاماژه دا وێ چه‌ندێ كو د رۆژێن بهێنه‌ڤه‌دانا سه‌رێ سالا نوى دا 198 په‌یوه‌ندى ب تیمێن 122 هاتینه‌كرن ژوان 22 روودانێن یاریێن ئاگرى بووینه كو 20 ژوان د سڤك بوون و ل جهێ روودانێ چاره‌سه‌ریا پێدڤى بۆ هاتبووكرن و دو كه‌سێن دى ژى بۆ نه‌خۆشخانێ هاتبوونه ڤه‌گوهاستن و حاله‌تێن دى ژى روودانێن ترۆمبێلان و گێژبوون و حاله‌تێن جودا جودا بوون، د هه‌مان ده‌م دا هه‌شت كه‌س ب روودانێن هاتنوچوونێ بریندارببوون و شه‌ش كه‌س ژ بلنداهیان كه‌فتبوون و هه‌شت روودانێن ب شه‌رچوونێ ژى هاتبوونه تۆماركرن.
به‌رپرسێ ڕاگه‌هاندنا رێڤه‌به‌ریا گشتى یا ساخله‌میێ ل پارێزگه‌ها دهۆكێ دیار كر كو د رۆژێن بهێنه‌ڤه‌دانا سه‌رێ سالا نوى یا زایینى دا زێره‌ڤانیا ساخله‌میێ ژى هه‌شت سه‌ره‌دان ئه‌نجامدابوون د ڤان سه‌ره‌دانان دا هۆشدارى دابوو 11 جهان و پێنج جه دائێخستبوون و دو جهێن دى ژى سزادابوون و گۆت: "د هه‌مان ده‌م دا 33 پشكنینێن كۆڤید – 19 هاتبوونه ئه‌نجامدان، به‌لێ د ئه‌نجام دا چو حاله‌تێن نوى نه‌هاتبوونه تۆماركرن، هه‌روه‌سا 107 نه‌خۆش ژى ره‌وانه‌یى نه‌خۆشخانا سۆتنێ و نشته‌رگه‌ریێن جوانكاریێ هاتبوونه‌كرن كو د پێكهاتیبوون ژ سۆتنێ و برینێن ده‌ست و پێیان و سه‌رۆچاڤان".
رێوار محه‌مه‌د ره‌شید
