103 پرۆژێن وەبەرهێنانێ د سالا بوری دا ل دهۆکێ هاتینە پەسەندکرن
دهۆک-KDP.info- رێڤەبەرێ ڕاگەهاندنێ ل رێڤەبەریا گشتی یا وەبەرهێنانێ ل پارێزگەها دهۆکێ دیار کر کو هژمارا پرۆژێن مۆلەتا وەبەرهێنانێ د سالا 2022ێ دا وەرگرین بەراورد دگەل سالا 2021ێ زێدەبووینە و گۆت: "د سالا 2022ێ دا 103پرۆژێن وەبەرهێنانێ ل پارێزگەها دهۆکێ هاتینە پەسەندکرن".
فەلاح حاجی حەسۆ، رێڤەبەرێ ڕاگەهاندنێ ل رێڤەبەریا گشتی یا وەبەرهێنانێ ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو د سالا 2022ێ دا 131 پرۆژێن وەبەرهێنانێ ل پارێزگەها دهۆکێ هاتبوونا پێشکێشکرن، بەلێ ژ ڤی سەرجەمی 103 پرۆژە ژ لایێ رێڤەبەریا گشتی یا وەبەرهێنانێ ل پارێزگەها دهۆکێ ڤە هاتینە پەسەندکرن و نوکە مامەلێن وان د قووناغا برێڤەبرنێ دانە دگەل لایەنێن پەیوەندیدار، ئەڤە د دەمەکی دایە ژ سەرجەمێ پرۆژێن هاتینە پەسەندکرن هەتا نوکە 16 پرۆژان مۆلەتا وەبەرهێنانێ وەرگرتیە و گۆت: "ئەو پرۆژێن مۆلەتا وەبەرهێنانێ وەرگرتین د بوارێن جودا جودا دابوون ژ وان شەش پرۆژە د بوارێ بازرگانی دا و چار پرۆژە د بوارێ ساخلەمیێ دا و دوو پرۆژا د بوارێ پەروەردە و فێرکرنێ دا و پرۆژەک د بوارێ پیشەسازیا چاندن و خوارنێ دا و سێ پرۆژە د بوارێ گەشتیاری دا بووینە، ئەڤە ددەمەکی دایە کو هژمارا پرۆژێن مۆلەتا وەبەرهێنانێ د سالا 2022ێ دا وەرگرین بەراورد دگەل سالا 2021ێ زێدەبووینە کو ئەو ژی 12 پرۆژەنە".
ناڤهاتی خویا کر کو سەرمایێ وەبەرهێنانێ د سالا 2022ێ دا 105,877,357 ملیۆن دۆلار بووینە و گۆت: "ژ سالا 2007 هەتا دووماهیا سالا 2022ێ 259 مۆلەتێن وەبەرهێنانێ هاتینەدان کو سەرمایێ وان 5,755,818,804,00 ملیار دۆلار بووینە، ئەڤە ددەمەکی دایە ب شێوەیەکێ گشتی 294 مۆلەتێن وەبەرهێنانێ هاتینەدان، بەلێ ژ بەر نەپێگێری و بجهئینانا رێنمایی و یاسایا وەبەرهێنانێ 36 پرۆژە هاتینە ڤەکێشان و هندەک ژ وان پرۆژان وەکو دەرفەتێن وەبەرهێنانێ دووبارە هاتینە ڕاگەهاندن".
رێوار محەمەد رەشید
