لە ڕۆژێکی وەک ئەمڕۆدا پێشمەرگە گەورەترین داستانی لە شارستێن تۆمار کرد

لە ڕۆژێکی وەک ئەمڕۆدا پێشمەرگەکانی پارتی دیموکراتی کوردستان لە ناوچەی جافایەتی لە گوندی شارستێن گەورەترین ھێرشی ڕژێمی ئەوکاتی عێراقیان تێک شکاند و زیانی گەورەیان بە ھێزەکانی دوژمن گەیاند. فەرماندەیەکی پێشمەرگەش دەڵێ، پێشمەرگە لە شارستێن نەبەردییەکی گەورەیان تۆمار کرد.

نەسرەدین مستەفا، فەرماندەی پێشمەرگە و بەشدار لە داستانی شارستێن دەڵێت: ''پێش شەڕەکە نامەیەک گەیشتە دکتۆر کەمال کەرکووکی کە ئەوکات فەرماندەی پێشمەرگە بوو لە دەڤەرەکە، گوایە ھێزەکانی دوژمن پێشڕەوی دەکەن و ھێزێکی گەورە گەیشتووەتە سێدەر و بەرەو سەنگەرەکانی پێشمەرگە دێت، ھێزەکانی پێشمەرگە دابەش کران و کەوتینە ئامادەباشی، من ئەوکات لە شارستێن بووم.''

فەرماندەکەی پێشمەرگە دەشڵێت: "ڕۆژی ٢٦/١٢/١٩٧٦ ھێزەکانی پێشمەرگە لە سنووری قەزای دووکان لە شارستێن بووین، لە بەرەبەیاندا ھێزەکانی دوژمن ھێرشیان کردە سەرمان، بەڵام ھێزەکانی پێشمەرگە لێیان ھاتنە دەست و شەڕێکی سەخت لە نێوان پێشمەرگە و سوپای عێراقدا بەڕێوە چوو، پێشمەرگە بە شێوەیەک ھێزەکەی دوژمنی تێک شاکاند کە داستانێکی کەموێنە لە مێژوودا تۆمار کرا.''

ئەو بەشداربووەی داستانی شارستێن ئاماژەی بۆ ئەوە کرد: "بەھۆی ئازایەتیی پێشمەرگەوە زیانی زۆر گەورە بەر ھێزەکانی دوژمن کەوت و دەیان سەرباز و پلەداریان لێ کوژرا و چەندین ئۆتۆمبێلی سەربازییان لەناو برا، بەداخەوە لەو نەبەردییەدا حەوت پێشمەرگە شەھید بوون کە یەکێک لە پێشمەرگە شەھیدەکان برای خۆم بوو، ھەر لەو شەڕەدا من و دکتۆر کەمال کەرکووکی بریندار بووین.''

قائید میرۆ