ب کۆژمێ نێزیکی پێنج ملیار دیناران قوتابخانە ل دهۆکێ دێ هێنە ئاڤاکرن

دهۆک -KDP.info- سکرتێرێ رۆژنامەڤانیێ پارێزگارێ دهۆکێ ئاشکرا کر کو سێ قوتابخانێن 18 رێزی ل سێ قەزایێن جودا یێن پارێزگەها دهۆکێ ژ لایێ (پ.د.عەلی تەتەر) پارێزگارێ دهۆکێ ڤە رەوانەیی بجهئینانێ هاتنەکرن.

مللەت عسمەت، سکرتێرێ رۆژنامەڤانیێ پارێزگارێ دهۆکێ بۆ ماڵپەرێ فەرمیێ پارتی دیموکراتی کوردستان دیار کر کر د چارچوڤێ بەرنامێ کابینا نەهێ یا حکومەتا هەرێما کوردستانێ دا بۆ پێشئێخستنا کەرتێ پەروەردە و فێرکرنێ، پارێزگارێ دهۆکێ سێ قوتابخانێن 18 رێزی ب کۆژمێ چار ملیار و 816 ملیۆن دیناران پرۆژێ ئاڤاکرنا سێ قوتابخانێن نوی ل سێ قەزایێن پارێزگەها دهۆکێ رەوانەی بجهئینانێ کر.

ناڤهاتی ئاماژە دا وێ چەندێ کو هەر ئێک ژ ڤان قوتابخانان دێ ل کۆمەلگەها سیریێ یا سەر ب ناحیا شێلادزێ ڤە ل سنوورێ دەڤەرا ئامێدیێ و ل سنوورێ ناحیا گردەسین یا سەر ب قەزا ئاکرێ ڤە و ل تاخێ حەوشکێ ل سنوورێ باژێرڤانیا تەناهیێ ل قەزا سێمێلێ دێ هێنە ئاڤاکرن و گۆت: "نوكه‌ ل پارێزگەها دهۆکێ هزار و 727 قوتابخانه‌ و 79 باخچێن زارۆیان هەنە و پرۆسێسا پرۆژێن ئاڤاکرنا قوتابخانە و باخچێن زارۆیان و چێکرنا هەمی پرۆژێن دی یێن خزمەتگۆزاری د بوارێن جوداجودا دا ل پارێزگەها دهۆکێ دێ یا بەردەوام بیت".

رێوار محەمەد رەشید