پرۆژێ سۆلار پاوه‌ر ل دهۆكێ هاته ڤه‌كرن
دهۆك –KDP.info- پرۆژێ سۆلار پاوه‌ر یێ به‌رهه‌مئینانا دوو مێگاواتێن كاره‌بێ ب رێیا تیشكا رۆژێ ئه‌ڤرۆ رۆژا چارشه‌مبى 21/12/2022 ب ئاماده‌بوونا چه‌ندین به‌رپرسێن حكومى ل هه‌رێما كوردستانێ و سه‌رۆكێ دانانا به‌رنامێ رێكخراوا UNDP ل به‌غدا و هه‌ولێرێ، ژ لایێ (پ.د.عه‌لى ته‌ته‌ر) پارێزگارێ دهۆكێ ڤه د ناڤ زانكۆیا دهۆك دا هاته ڤه‌كرن.
پ.د.عه‌لى ته‌ته‌ر، پارێزگارێ دهۆكێ د په‌یڤه‌كێ دا گۆت: "خوه‌شحالین كو ئه‌ڤرۆ پرۆژه‌كێ گه‌له‌ك گرنگ ل باژێڕێ دهۆكێ هاتیه بجهئینان و ڤه‌كرن كو ئه‌ڤ جوره پرۆژه ئه‌زموونه‌كا سه‌ركه‌فتى نه ل سه‌ر ئاستێ هه‌مى جیهانێ، به‌لێ ره‌نگه بۆ مه ئه‌زموونه‌كا نوى و یا ده‌ستپێكى بیت كو ئه‌م شیاین ب هاریكاریا UNDP و پاره‌دانكرنا ئێكه‌تیا ئورۆپى ڤى پرۆژه‌ى ب ڤى قه‌باره‌ى ئه‌نجام بده‌ین".
پارێزگارێ دهۆكێ خویا كر كو ئه‌و دخوازن ئه‌ڤ پرۆژه ببیته سه‌ربووره‌كا باش بۆ كۆمپانیێن جێبه‌جێكار و كۆمپانیێن دى یێن كوردستانێ و عیراقێ، ژ به‌ر كو ئه‌ڤ ئه‌زموونه ل هه‌مى وه‌لاتێن جیهانێ بوویه وزه‌كا به‌رده‌وام ژ روویێ ئه‌رزانیێ و ساخله‌میێ و پاراستنا ژینگه‌هێ ڤه و ئه‌ڤه دده‌مه‌كى دایه كو جه‌نابێ سه‌رۆكێ حكومه‌تا هه‌رێما كوردستانێ ژى ئه‌و راسپاردینه به‌رده‌وام كاربكه‌ن بۆ وێ چه‌ندێ مفایى ژ وزه‌یا پاقژ بهێته وه‌رگرتن چو ب رێیا دروستكرنا به‌نداڤان بیت یان ژى ب رێیا چێكرنا پرۆژێن ب ڤى شێوه‌یى و هتد... بیت، به‌لێ بێگۆما ئه‌ڤ پرۆژێن مفا ژ تیشكا رۆژێ دهێته وه‌رگرتن ب ساناهیتر دهێنه بجهئینان و گۆت: "وه‌زاره‌تا كاره‌با حكومه‌تا هه‌رێما كوردستانێ ژى ژ ئالیێ خوه ڤه هه‌مى ئاسانكارى بۆ وان كۆمپانیێن ڤان جوره پرۆژان ئه‌نجام دده‌ن كرینه، نوكه ژى ئه‌م دگه‌ل هنده‌ك كۆمپانیان گه‌هشتینه رێككه‌فتنێن دووماهیێ كو دشیان دایه 100 مێگاواتێن كاره‌بێ دابین بكه‌ن، به‌لێ بتنێ دڤێت ئه‌ردێ پێدڤى بۆ ڤان كۆمپانیان بهێته دابینكرن، سۆزێ دده‌ین ڤه‌كرن و دانانا به‌رێ بنیاتى بۆ پرۆژێن نوى یێن خزمه‌تگۆزارى ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ یا به‌رده‌وام بیت".
هه‌ژى گۆتنێ یه كو ئه‌ڤ پرۆژه ل سه‌ر رووبه‌رێ 22 هزار مه‌ترێن دووجا د ناڤ زانكۆیا دهۆك دا ب كوژمێ نێزیكى دوو ملیۆن دۆلاران هاتیه دانان، ئه‌ڤ پرۆژه ژ لایێ كۆمپانیه‌كا ئه‌لمانى ڤه هاتیه دیزاینكرن بۆ دانا دوو هزار و 39 كیلواتێن كاره‌بێ و ژ لایێ كۆمپانیا تكنوسات یا كه‌هرومیكانیكى ڤه هاتیه بجهئینان، هه‌روه‌سا گه‌ره‌نتیا ڤان جوره پرۆژان 25 سالن.
رێوار محه‌مه‌د ره‌شید
