ئەرد بۆ 10 کارگەهێن پیشەسازی و دەڤەرا پیشەسازیا بەردەرەش هاتە تەرخانکرن

دهۆک -KDP.info- سکرتێرێ رۆژنامەڤانی یێ پارێزگارێ دهۆکێ دیار کر کو لژنا گەشەپێدان و پشتگریا پیشەسازی ل پارێزگەها دهۆکێ ئەڤرۆ رۆژا دووشەمبی 19/12/2022 کۆمبوونەک ب سەرپەرشتیا (پ.د.عەلی تەتەر) پارێزگارێ دهۆکێ ئەنجامدا و د کۆمبوونێ دا بڕیارا تەرخانکرنا ئەردی بۆ 10 کارگەهێن پیشەسازی و دەڤەرا پیشەسازیا بەردەرەش هاتە دان.
مللەت عسمەت، سکرتێرێ رۆژنامەڤانی یێ پارێزگارێ دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو د کۆمبوونا ئەڤرۆ یا لژنا گەشەپێدان و پشتگریا پیشەسازی ل پارێزگەها دهۆکێ دا کو لایەنێن پەیوەندیدار تێدا ئامادەببوون، پشتی هەلسەنگاندن و دانوستاندن ل دۆر پرۆژێن کارگەهان هاتیەکرن، ئەرد بۆ 10 کارگەهێن پیشەسازی ل پارێزگەها دهۆکێ هاتە تەرخانکرن و ل دەمەکێ نێزیک دێ دەست ب دانانا ڤان کارگەهان هێتەکرن و گۆت: " ئەو کارگەهێن ئەرد بۆ هاتیە تەرخانکرن پێکدهێن ژ کارگەهێن (چێکرنا پێدڤیێن ئاڤاهیێن ئامادەکری، گێج و بویاغێ، ئیزوگام و فلینکوت و قێر ماستیک، درینا جل و بەرگان، بەرهەمئینانا فلینێ و دیکورێن خانیا و بوریێن پلاستیکی، کلینیسێن هشک، مەلەڤانگەهێن فایبەر گلاس و کورسیک و سەیوانێن باخچا، دروستکرنا دوشەک و بالیفک و چارچەڤا، بەرهەمئینانا کەرەستەیێن ئاڤاهیان)".
ناڤهاتی ئاماژە دا وێ چەندێ کو د هەمان کۆمبوون دا بەحسێ دەڤەرا پیشەسازیا بەردەرەش هاتەکرن ئەردێ پێدڤی بۆ ڤێ دەڤەرێ ژی هاتە تەرخانکرن.
رێوار محەمەد رەشید