گرێبەستەکا نوی بۆ هەلکۆلین و پاراستنا شوونوارێن دهۆکێ دگەل ئیتالیا هاتە ئیمزاکرن
دهۆک -KDP.info- رێڤەبەرێ شوونوار و کەلەپۆرێن پارێزگەها دهۆکێ دیار کر کو گرێبەستەکا نوی بۆ هەلکولین و دیکیۆمێنتکرن و پاراستنا شوونوارێن پارێزگەها دهۆکێ دگەل زانکۆیەکا ئیتالی هاتە ئیمزاکرن، د هەمان دەم دا کوژمێ پتری ملیۆن یورۆیان ژی بۆ پارکا شوونواری یا پارێزگەها دهۆکێ هاتنە تەرخانکرن.
د. بێکەس بریفکانی، رێڤەبەرێ شوونوار و کەلەپۆرێن پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو د چارچوڤێ سەرەدانا شاندێ شوونوار و کەلەپۆرێن هەرێما کوردستانێ دا بۆ وەلاتێ ئیتالیا دوهی رۆژا 16/12/2022 ئەو پشکداری رێورەسمێن سالڤەگەڕا ڤەکۆلینێن شوونواری یا زانکۆیا ئودونی ل رۆژهەلاتا ناڤەڕاست ببوون، د ڤان رێورەسمان دا کو ژمارەکا کەسایەتیێن گرنگ یێن وەلاتێ ئیتالیا تێدا پشکدارببوون، رێڤەبەرێ گشتی یێ شوونواران ل هەرێما کوردستانێ د پەیڤەکێ دا بەحسێ هەماهەنگی و پشتەڤانیا حکومەتا هەرێما کوردستانێ بۆ تیمێن بیانی ب تایبەتی زانکۆیا ئودونی کر و گۆت: "د هەمان دەم دا رەزامەندی ل سەر مەزاختنا ملیۆنەک و 400 هزار یورۆیان بۆ پارکا شوونواری یا پارێزگەها دهۆکێ هاتەکرن، دووڤ دا شاندێ ناڤهاتی پشکداری د ڤەکرنا پێشانگەها کارێ شوونواری یێ تیمێن زانکۆیا ئودونی ل پارێزگەها دهۆکێ و وەلاتێ سووریا دا کر کو د ناڤ مۆزەخانەکێ دا هاتبوو دروستکرن".
ناڤهاتی ئاماژە دا وێ چەندێ کو د هەمان دەم دا گرێبەستەکا نوی یا شوونواری ژ لایێ رێڤەبەرێ گشتی یێ شوونواران ل هەرێما کوردستانێ ڤە دگەل سەرۆکا زانکۆیا پالێرمو یا ئیتالی هاتە ئیمزاکرن بۆ هەلکۆلین و دیکۆمێنتکرن و پاراستنا 30 جهێن شوونواری ل دەوروبەرێن بەنداڤا مووسل ل سنوورێ پارێزگەها دهۆکێ و گۆت: " ئەڤ کارە دێ ب نووترین ئامیرێن سەردەمیانە هێتە ئەنجامدان".
رێوار محەمەد رەشید
