ئەڤرۆ رۆژا ئالایێ کوردستانێ دێ بلند هێتە ڕاگرتن

دهۆک -KDP.info- ب هەلکەفتا 12/17 رۆژا ئالایێ کوردستانێ ئەڤرۆ رۆژا شەمبی 2022/12/17 ئەڤ رۆژە دێ ل سەرانسەری هەرێما کوردستانێ بلند هێتە ڕاگرتن و چەندین کار و چالاکیێن جوداجودا ب ڤێ هەلکەفتێ دێ هێنە ئەنجامدان.

پەلەوان شێخ مەمی، بەرپرسێ دەزگەهێ گشتی یێ پاراستنا ئالایێ کوردستانێ بۆ ماڵپەرێ فەرمیێ پارتی دیموکراتی کوردستان دیار کر کو ب هەلکەفتا 12/17 رۆژا ئالایێ کوردستانێ ئەڤرۆ ل دەمژمێر 10:55 سپێدێ، ئالایێ پیرۆزێ کوردستانێ دێ ل سەرانسەری هەرێما کوردستانێ هێتە بلندکرن، هەروەسا د هەمان دەم دا شریناهی و ئالایێن کوردستانێ دێ ل جادەیان ل سەر خەلکی هێنە بەلاڤکرن و گۆت: "ل رۆژێن بوری ژی نێزیکی 12 هزار ئالایێن کوردستانێ ژ لایێ دەزگەهێ گشتی یێ پاراستنا ئالایێ کوردستانێ و نڤیسینگەهێن ب سەر دەزگەهێ ناڤهاتی ڤە ل هەمی باژێر و باژارۆکێن هەرێما کوردستانێ هاتینە بەلاڤکرن".

ناڤهاتی ئاماژە دا وێ چەندێ کو ب هەمان هەلکەفت ئەڤرۆ دێ ئالایێ کوردستانێ ل ناڤەندێن خواندنێ یێن هەرێما کوردستانێ ژی هێتە بلندکرن، ئەڤە ددەمەکی دایە هندەک قووناغێن ڤان ناڤەندێن خواندنێ د ئەزموونان دانە و گۆت: "هەر ب هەلکەفتا ڤێ رۆژا پیرۆز ل رۆژێن داهاتی د رێورەسمەکێ ژ هەژی دا دێ 17 کەسێن خودان خزمەت د بوارێن جوداجودا دا ل سەرانسەری هەرێما کوردستانێ هێنە خەلاتکرن کو لیژنەکا تایبەتمەند ئەڤ کەسە بۆ وەرگرتنا خەلاتی هەلبژارتینە".

هەژی گۆتنێ یە کو د بەردەوامیا وان کار و چالاکیان دا یێن کو ب هەلکەفتا رۆژا ئالایێ کوردستانێ دهێنە ئەنجامدان، ئەڤرۆ رێڤەبەریا رەوشەنبیری و هونەری ل سێمێلێ دێ پێشانگەهەکا شێوەکاری یا هەڤپشک بۆ ژمارەکا شێوەکاران ڤەکەت، د هەمان دەم دا رێڤەبەریا لاوان ل پارێزگەها دهۆکێ ب هەڤکاری دگەل ناڤەندا وەرزش و لاوان دهۆک و دومیز دێ سمینارەکێ ل دۆر مێژوویا ئالایی پێشکێش کەن و چالاکیەکا هونەری ئەنجامدەن، هەروەسا زانکۆیا نەورۆز ژی دێ کەرنەڤالێ ئالایێ کوردستانێ گێڕیت و چەندین کار و چالاکیێن دی یێن جودا ئەڤرۆ ب ڤێ هەلکەفتێ دێ ل هەمی باژێر و باژارۆکێن هەرێما کوردستانێ هێنە ئەنجامدان.

 

 

رێوار محەمەد رەشید