دەست ب چێکرنا رێیێن ناڤخۆ و سۆلینێن ئاڤرێژ ل باتیفا هاتەکرن

دهۆک -KDP.info- بەرپرسێ ڕاگەهاندنێ ل رێڤەبەریا گشتی یا باژێرڤانیان ل پارێزگەها دهۆکێ دیار کر کو دەست ب چێکرنا قووناغا دووێ یا پرۆژێ رێیێن ناڤخۆ و سۆلینێن ئاڤرێژ ل قەزا باتیفا هاتەکرن.

ئەمیر ئەترووشی، بەرپرسێ ڕاگەهاندنێ ل رێڤەبەریا گشتی یا باژێرڤانیان ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو د بەردەوامیا چێکرنا پرۆژێن نوی یێن خزمەتگۆزاری دا یێن کو ل سەر دەمێ کابینا نەهێ یا حکومەتا هەرێما کوردستانێ دهێنە بجهئینان، نوکە دەست ب چێکرنا قووناغا دووێ یا پرۆژێ رێیێن ناڤخۆ و سۆلینێن ئاڤرێژ ل سەنتەرێ قەزا باتیفا ل سنوورێ ئیدارا سەربەخۆ یا زاخۆ هاتەکرن.

ناڤهاتی ئاماژە دا وێ چەندێ کو کوژمێ 636 ملیۆن و 351 هزار و 750 دینار بۆ بجهئینانا ڤی پرۆژەی ل سەر بودجا پەرەپێدانا پارێزگەها و ئیدارێن سەربەخۆ یا سالا 2022 هاتینە تەرخانکرن و گۆت: "ئەڤ پرۆژە ژ لایێ کۆمپانیەکێ ڤە دهێتە ئەنجامدان و ل دەمەکێ نێزیک ئەڤ پرۆژە دێ ب دووماهی هێت و کەڤیتە د خزمەتا خەلکێ دەڤەرێ دا".

بەرپرسێ ڕاگەهاندنێ ل رێڤەبەریا گشتی یا باژێرڤانیان ل پارێزگەها دهۆکێ خویا کر کو دوهی رۆژا 12/12/2022 د رێورەسمەکی دا باخچێ باتیفا   یێ گشتی هاتە ڤەکرن و گۆت: "ئەڤ باخچە ب کوژمێ 160 ملیۆن دیناران ل سەر بودجا ئیدارا سەربەخۆ یا زاخۆ ڤە ژ لایێ باژێرڤانیا باتیفا ڤە هاتیە بجهئینان".

رێوار محەمەد رەشید