به‌نداڤا پێنجێ یا ژێر ئاڤ د ناڤ خابیرێ زاخۆ دا د قووناغا دووماهیێ دایه
دهۆك -KDP.info- رێڤه‌به‌رێ گه‌شتوگۆزارا زاخۆ دیار كر كو كار د چێكرنا به‌نداڤێن ژێر ئاڤا دا یێن كو د ناڤ خابیرێ زاخۆ دا دهێنه چێكرن یێ به‌رده‌وامه و هه‌تا نوكه چار ژ وان به‌نداڤان ب دووماهى هاتینه و ل ده‌مه‌كێ نێزیك دێ به‌ندڤا پێنجێ كو به‌نداڤا دووماهیێ یه ژ ڤى پرۆژه‌ى ب دووماهى هێت و كه‌ڤیته د خزمه‌تا خه‌لكێ ده‌ڤه‌رێ و گه‌شتیاران دان.
__2022_12_10_h19m2s39__HK.jpg)
چیا ئه‌مین، رێڤه‌به‌رێ گه‌شتوگۆزارا زاخۆ بۆ ماڵپه‌رێ فه‌رمیێ پارتى دیموكراتى كوردستان دیار كر كو پشتى ئیدارا سه‌ربه‌خۆ یا زاخۆ ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ هاتیه ڕاگه‌هاندن ئێكسه‌ر ده‌ست ب چێكرنا پرۆژێن خزمه‌تگۆزارى ل سنوورێ ئیدارا ناڤهاتى هاته‌كرن، ل هه‌یڤا ئادارا ئه‌ڤ ساله به‌رێ بنیاتى بۆ پرۆژێ چێكرنا پێنج به‌نداڤێن ژێر ئاڤ د ناڤ خابیرێ زاخۆ دا ب كوژمێ سێ ملیار و 172 ملیۆن و 281 هزار دیناران هاتبوو دانان و ئێكسه‌ر ئه‌ڤ پرۆژه كه‌فتبوو د بوارێ بجهئینانێ دا، نوكه چار به‌نداڤ ژ ڤى پرۆژه‌ى ب دووماهى هاتینه و كار د چێكرنا به‌نداڤا پێنجێ دا ژ ڤى پرۆژه‌ى یێ به‌رده‌وامه و ل ده‌مه‌كێ نێزیك دێ ب دووماهى هێت و كه‌ڤیته د خزمه‌تا خه‌لكێ ده‌ڤه‌رێ و گه‌شتیاران دا زێده‌بارى ڤێ چه‌ندێ دێ روویه‌كێ جوانتر ژى ده‌ته سنوورێ ئیدارا سه‌ربه‌خۆ یا زاخۆ.
ناڤهاتى ئاماژه دا وێ چه‌ندێ كو كه‌رتێ گه‌شتوگۆزارێ ل ئیدارا سه‌ربه‌خۆ یا زاخۆ ب پشته‌ڤانیا كابینا نه‌هێ یا حكومه‌تا هه‌رێما كوردستانێ پێشڤه‌چوونه‌كا به‌رچاڤ ب خوه‌ڤه دیتیه و ژ بلى پرۆژێ به‌نداڤان چه‌ندین پرۆژێن دى یێن گه‌شتیارى نوكه ل سنوورێ ئیدارا ناڤهاتى د قووناغا بجهئینانێ دانه ژ وان نوكه كار د نووژه‌نكرنا بازارێ دێرینێ زاخۆ دا یێ به‌رده‌وامه، ئه‌ڤ بازاره دێ بشێوه‌یه‌كێ كه‌ڤنار و ل دووڤ ره‌سه‌ناتیا وى یا به‌رێ هێته چێكرن كو ده‌بڕینێ ژ مێژوویا كه‌ڤنارا هه‌مان بازار بكه‌ت، هه‌روه‌سا نوكه كار د چێكرنا پرۆژێ (پاركا ده‌لال) ژى دا ل سه‌ر خابیرێ زاخۆ یا به‌رده‌وامه و هه‌كه چ ئاسته‌نگ په‌یدا نه‌بن ل ده‌ستپێكا سالا داهاتى دێ ئه‌ڤ پرۆژه ژى ب دووماهى هێت كو پترى 70% ژ ڤى پرۆژه‌ى كه‌سكاتیه و سه‌ره‌رایى ڤێ چه‌ندێ مۆزه‌خانه‌كا سه‌رده‌مانه و جهێ پیادێ و هتد... ب خوه‌ڤه دگریت، ئه‌ڤه د ده‌مه‌كى دایه كو چه‌ندین پرۆژێن گه‌شتیارى ژ لایێ كه‌رتێ تایبه‌ت ژى ڤه ل سنوورێ هه‌مان ئیداره د قووناغا بجهئینانێ دانه و گۆت: "د پلانا ئیدارا سه‌ربه‌خۆ یا زاخۆ دایه د سالێن بهێت دا خابیرێ زاخۆ ب درێژاهیا 18 كیلومه‌تران د ناڤ سه‌نته‌رێ زاخۆ دا ببیته ده‌ڤه‌ره‌كا گه‌شتیارى و ب جهئینانا ڤان پرۆژێن گه‌شتیارى دێ رێژا بێكاریێ ل زاخۆ كێم بیت و دێ پتر ده‌لیڤێن كارى دێ بۆ خه‌لكێ زاخۆ په‌یدابن".
رێڤه‌به‌رێ گه‌شتوگۆزارا زاخۆ خویا كر كو دوور ژ ئه‌نجامدانا پرۆژێن خزمه‌تگۆزارى رێڤه‌به‌ریا وان ب ئه‌ركێ خوه زانیه كو خوه ل وان كه‌سێن كارێن ده‌ستى ل نوورێ ئیدارا سه‌ربه‌خۆ یا زاخۆ ئه‌نجام دده‌ن بكه‌نه خودان و د ئه‌ڤ ساله دا وان دو پێشانگه‌هێن كارێن ده‌ستى و به‌رهه‌مێ خۆمالى ڤه‌كرینه و پێشانگه‌ها سێیێ ژى دێ ب هه‌لكه‌فتا سه‌رێ سالا نوى یا زایینى ڤه‌كه‌ن و د پلانا وان دایه ل سالا داهاتى ژى به‌رده‌وامى ب ڤه‌كرنا ڤان جوره پێشانگه‌هان بهێته دان.
رێوار محه‌مه‌د ره‌شید
