گەڕا نەهێ یا فلمە فیستەڤالا دهۆک یا نێڤدەولەتی هاتە ڤەکرن
دهۆک-KDP.info- گەڕا نەهێ یا فلمە فیستەڤالا دهۆک یا نێڤدەولەتی ئەڤرۆ رۆژا پێنجشەمبی 1/12/2022 ل دەمژمێر 4:00 ئێڤاری ب ئامادەبوونا (پ.د.عەلی تەتەر) پارێزگارێ دهۆکێ و د.سالار ئوسمان، برێكارێ وه‌زاره‌تا ره‌وشه‌نبیری و لاوان یا حکومەتا هەرێما کوردستانێ و (ئەمیر عەلی) سەرۆکێ فلمە فیستەڤالاتی و قۆنسل و چەندین سینەماکارێن ناڤخۆ و بیانی و خەلکێ دەڤەرێ ب نیشادانا فلمێ (بیکا بارانێ) یێ دەرهێنەر (حسێن حەسەن) ل هۆلا کۆنگران ل زانکۆیا دهۆک هاتە ڤەکرن و هەتا رۆژا پێنجشەمبی 8/12/2022 دێ یا بەردەوام بیت.
پ.د.عەلی تەتەر، پارێزگارێ دهۆکێ د پەیڤەکێ دا دیار کر کو هەر جارەکا مرۆڤ باژێرێن جودا یێن پارێزگەها دهۆکێ دبینیت هزرا مرۆڤی بۆ داهێنان و نوویاتیێ پتر گەشێ دکەت و حەزا مرۆڤی بۆ هۆنەر و سینەمایێ پتر لێ دهێت، ژینگەهـ و سرۆشتێ دەڤەرێ و شیانێن هونەرمەند و سینەماکارێن مە دگەلهەڤ دگونجاینە هەر دوو پێکڤە سینەمایەکا ژ هەژی پێکدئینن، فیستەڤالا سینەمایێ روودانەکا گرنک و مەزنا سالانە یا پارێزگەها دهۆکێ یە، ب پشتەڤانیا حکومەتا هەرێما کوردستانێ گەڕا خوە یا نەهێ دگێڕیت، سۆپاسیا بەرێز "مەسرور بارزانی” سەرۆکێ حکومەتا هەرێما کوردستانێ و پشتەڤانیا جەنابێ وان دکەین و گۆت: "بێگۆمان سینەما بۆ ئێک ژمەزنترین گەلێن بێ دەولەت ئامرازەکێ هەری کاریگەر و پەیامەکا هەرە بهێزە دشێت باشترین رۆل دگەهاندنا دەنگێ گەلێ کوردستانێ ب هەمی پێکهاتێن وێ ڤە بگێریت، جوانیان نیشان بدەت، ئاشتی و پێکڤەژیانا دەڤەرێ بکەتە میناک، حەزا کوردستانیان بۆ ژیانێ و کەلتورێ دەولەمەندێ کوردستانێ نیشانبدەت، رەنگە ژیانا هەر تاکەکێ کوردستانێ ب تایبەتی ل بەری سەرهلدانا بوهارا ١٩٩١ێ چیرۆکا فلمەکێ سینەمایی بیت و ژانێن گەلێ مە نیشان بدەت، لێ دهەمان دەم دا رویێ ئاڤەدانی و شارستانی و کاروانێ ژیانکرن ب ئازادی و ئاشتی پشکەکا دی یا سەرەکی یا مەیە، لەوڕا هیڤیدارین فلمێن مە دەربڕینا ژیان و کەد و خەباتا گەلێ مە بۆ تێکوشین و ژیانێ بن".
پارێزگارێ دهۆکێ ئاماژە دا وێ چەندێ کو فلمە فیستەڤالا دهۆک یا نیڤدەولەتی مژارا ئەڤ سالە کوچبەریە، گەلێ مە و کوچبەریێ گەلەک چیرۆکێن درێژ و ب خەم و ژان هەنە، کوچبەریێ ژیانا نەتەوەکێ دژی ستەم و زۆلم و زورداریێ رزگارکر، گەلێ مە نە بتنێ ل سەر ئاستێ تاک بەلکو ل سەر ئاستێ ملیونی و کومێ کوچبەری دیتیە و ئەز ژی ئێک ژوان کەسامە یێن ژیانا کوچبەریێ دیتی، لەورا ژیانا کوچبەریێ ب زەحمەتر ژ فلمەکێ سینەمایی دهێتە بەرچاڤێن مە، ئەڤرۆ کوچ و کوچبەری ب تێگەهەکێ دی و پێدڤیەکا دی دهێتە دیتن لێ هەڤبەشیێن کوچبەریێ دهەمی دەمان دا ئێکن، هیڤیدارین مرۆڤ و مرۆڤایەتی دتەناهیێ دا ل سەر ئاخێن وەلاتێن خۆ بژین و گۆت: "گەڕا نەهێ یا فلمە فیستەڤالا دهۆک یا نێڤدەولەتی مێهڤانداریا سینەما وەلاتێ سوید ژ باکوورێ ئورۆپا کریە هیڤیدارین ئەڤ مێهڤانداریە مفایی ل سینەما کوردی بکەت و پەیوەندیێن هەر دوو وەلاتان خورتر بکەت، سوید وەلاتەکێ تەنا و ئارامە دلخوەشین ب مێهڤانداریا سینەمایا وان بخێربیێن بۆ باژێرێ خۆ، ٩٨ فلم ل هەر دوو پشکێن سینەما کوردی و جیهانی دێ هێنە نیشاندن، ب ئومێدین دەمێن خۆش ل باژێرێ دهۆکێ دگەل وان فلمان ببورینن و دەربرین بن ژ هەڤپشکیێن مرۆڤایەتیێ و نیشاندانا جوانیا جوداهیان، پیرۆزە فیستەڤال ل سینەماکار و هونەرمەندێن کوردستانێ و وەلاتێن مێهڤان، دەستخوشی بۆ لایەنێن رێکخەر و هەڤکار و گرۆپێن خۆبەخش، رێیا هەوە بەردەوام بیت، ببنە رێنیشاندەر بۆ نوبەرە و گەنجێن مە، بخێربهێن بۆ دهۆکێ باژێرێ جوانی و سینەمایێ".
ژ ئالیێ خوە ڤە ئەمیر عەلی سەرۆکێ گەڕا نەهێ یا فلمە فیستەڤالا دهۆک یا نێڤدەولەتی گۆت: "جهێ دل خوەبیێ یە ئەم شیاین جارەکا دی ڤێ بوویەرا گرنگ گەڕا نەهێ یا فملە فیستەڤالا دهۆک یا نێڤدەولەتی ئەنجامبدەین و ب فەر دزانم پیروزباهیێ ل هەمی فلمساز و هونەرمەندان بکەم سەرەرای هەمی ئاستەنگ و گرفتان ژمارەکا دی ل سەر گەرێن فلمە فیستەڤالێ زێدەکەین، دناڤ کاودانێن سەخت و ئالوز و نالەباردا راوەستاندنا لڤین و بزاڤێن کولتووری یانژی گیروکرنا وان پەیامەکا شاش و نەگونجایی دگەهینیت، بەلکی بەرۆڤاژی خورتکرن و پشتگیریکرنا ڤان بزاڤان نەمازە بوویەرەکا بەرچاڤ یا وەکی فلمە فیستەڤالێ گرنکترین بەرسڤ و بەرهنگاریە بۆ گەلەک ئاریشێن مە یێن جڤاکی. دەوروبەرێن مە بەری هەر تشتەکی تیرێن خو یێن دژوار ئاراستەیی سازی و پرۆژەیێن رەوشەنبیری دناڤ مللەتێ مە دا دکەن، چونکی ئەو باش دزانن هزر و رەوشەنبیریەت ئاسێترین چەپەرەێن بەرگریێ نە، هەر دەما ئەڤ چەپەرە شکەستن ورە و مورالێ بەرەڤانیێ د چەپەرێن دی دا لاواز دبیت، سینەما ئالاڤەکێ ب هێزە بۆ کارتێکرنێ ل سەر ئاستێ هزری و هوشمەندیێ زێدەباری رولێ وێ د گوهۆڕین و پێشکەفتنا جڤاکی و مرۆڤاتیێ دا". ناڤهاتی ئاماژە دا وێ چەندێ کو فیستەڤال دەرفەتەکە بۆ خرڤەکرنا هونەرمەند و فلمسازێن کورد و بیانی بۆ پتر ئێکدو نیاسینێ و لێکگوهارتنا سەربوور و پرۆژەیان، ئانکو فیستەڤال پرەکە بۆ ڤێکراگەهشتنا کولتووران.
هەژی گۆتنێ یە کو ژ سه‌رجه‌مێ 570 فلمێن بۆ گەڕا نەهێ یا فلمە فیستەڤالێ هاتینه هنارتن بتنێ 98 فلم هاتینه هه‌لبژارتن ژ وان 51 فلمێن كوردى نه و 47 فلمێن بیانى نه و ژ سه‌رجه‌مێ فلمێن هاتینه هه‌لبژارتن 55 فلم د به‌ریكانێ دانه كو ژ وان 27 فلمێن كوردى نه و 28 فلمێن بیانى نه، هه‌روه‌سا د هه‌مان گه‌ڕا فلمه فیسته‌ڤالێ دا 20 ژوورى د پشكدارن.
د.سالار ئوسمان، برێكارێ وه‌زاره‌تا ره‌وشه‌نبیری و لاوان یا حکومەتا هەرێما کوردستانێ د پەیڤەکێ دا دیار کر کو وه‌كو نه‌ریته‌ك هه‌ر سال فلمە فیستەڤالا دهۆک یا نێڤدەولەتی وه‌لاته‌كی مێهڤان دكه‌ت ڤێ جارێ ژی وه‌لاتێ سوید بوویه ژ به‌ر كو سوید وه‌لاته‌كێ گرنگه ژ روویێ سیسته‌می ڤه و هه‌روه‌سا ژ روویێ هونه‌ری ڤه بتایبه‌ت هونه‌رێ سینه‌مایێ، هەروەسا وه‌لاتێ ناڤهاتی گه‌له‌ك كۆچبه‌ر ل خوە كۆمكرینه و ب چاڤێ رێزێ بەرێخودانێ و سه‌ره‌ده‌ریه‌كا تایبه‌ت دگه‌ل دا دكه‌ت، ئەڤە ددەمەکی دایە ژماره‌ك ژ وان كۆچبه‌ران كوردن ژ هه‌ر چار پارچێن كوردستانێ، ژ به‌ر ڤێ چەندێ مه مێهڤانداریا وه‌لاتێ سوید كریه، هه‌روه‌سا ئه‌و پێنگاڤا فلمه فیستەڤالا دهۆك هاڤێتی و فلم د ناڤ خه‌لكێ پەنابەر دا بهێنه نیشادان پێنگاڤه‌كا گەلەک گرنگ بوو، چونكۆ ئێك ژ خاسله‌تێن پێشكه‌فتنا هه‌ر كاره‌كی هه‌لبژارتنا جهی یه و كه‌مپ هه‌لبژارتنه‌كا باش بوو دا كو پتریا هونه‌رمه‌ند و سیاسه‌تمه‌دار و ره‌وشه‌نبیر و خه‌لكێ بیانی سه‌رەدانا كه‌مپێن پەنابەران بكه‌ن بۆ وێ چەندێ ئه‌و ژی ره‌وش و ئازارێن وان بچاڤێن خوە ببینن، هەرێما کوردستانێ ب خوە ژی ژمارەکا مەزن یا پەنابەر و ئاوارەیان ڤەحەواندینە ئەڤە ژی وێ چەندێ دگەهینیت کو کوردستان پەناگەها کۆچبەر و ئاوارەیانە و یا ئارامە و گۆت: " هەکە ئه‌م ره‌وشا ئابووری و یا سیاسی یا كوردستانێ دگه‌ل وەلاتێن دی بەراورد بکەین، ره‌وشا مه ژ یاوان لاوازتره، بەلێ سه‌باره‌ت به‌رهه‌ڤیێن فلمان گه‌له‌ك فلمێن كوردی یێن دئاستێ جیهانێی دا و سینه‌ما كوردی یا دئاسته‌كێ بلند دا، مه وه‌كو حكومه‌تا هه‌رێمێ د هه‌ر نه‌هـ كابینێن خوە دا پشتەڤانیا هونه‌رێ سینه‌مایێ كریه و جەنابێ سه‌رۆكێ حكومه‌تێ ژی پشتەڤانیەکا مه‌زن ل بوارێ كه‌لتۆری و هونه‌رێ و ره‌وشه‌نبیری دا دكه‌ت و بتایبه‌ت دبوارێ سینه‌مایێ دا و ل گەڕا بوری یا فلمە فیستەڤالێ جەنابێ وی ب خوە ژی د فلمه فیستەڤالا دهۆک یا نێڤدەولەتی دا ئامادەببوو و گۆتاره‌ك پێشكێشكربوو، ئه‌ڤه بخوە د سه‌لمینیت كو هه‌ر ده‌م یێ پشته‌ڤان بوویه".
برێكارێ وه‌زاره‌تا ره‌وشه‌نبیری و لاوان یا حکومەتا هەرێما کوردستانێ گۆت: "من پێ باشه بابه‌ت و چیرۆكێن گرێدایی ب سینه‌مایێ ڤه كوردستان وه‌كو خۆ نیشان بده‌ت، به‌لێ دڤێت ئه‌م ئه‌ركێ نه‌ته‌وه‌یی و نیشتیمانی ژبیرنه‌كه‌ین و خه‌مێن نه‌بوونا ده‌وله‌تێ و داگێركه‌ران وه‌كو ئه‌رك ببنه چیرۆكێن فلمێن كوردی، مه وه‌كو جڤاتا ره‌وشه‌نبیرى و لاوان بڕیار دایه كو هه‌ر سال فلمە فیستەڤالا دهۆک یا نێڤدەولەتی بهێته ئه‌نجامدان".
رێوار محەمەد رەشید
