خەلکێ پارێزگەها دهۆکێ د مەراسیمەکێ دا هەڤخەمیا خوە بۆ کارەساتا باژێڕێ سلێمانیێ دیار کر

دهۆک-KDP.info- خەلکێ پارێزگەها دهۆکێ ئەڤرۆ رۆژا شەمبی 19/11/2022 د مەراسیمەکێ دا ب ئامادەبوونا (پ.د.عەلی تەتەر) پارێزگارێ دهۆکێ هەڤخەمیا خوە بۆ قوربانیێن کارەساتا دلتەزینا باژێڕێ سلێمانیێ یا کو ل شەڤا 17 ل سەر 2022/11/18  ژ ئەگەرێ پەقینا تانکەکێ غازێ روودای و د ئەنجام دا ژمارەکا وەلاتیان گیانێ خوە ژدەستدای و ژمارەکا دی یا وەلاتیان بریندار بووی دیار کر.

پ.د.عەلی تەتەر، پارێزگارێ دهۆکێ د ڤێ مەراسیمێ دا گۆت: "بناڤێ هه‌مى خه‌لكێ پارێزگه‌ها دهۆكێ و كارگێری و جڤاتا پارێزگه‌ها دهۆكێ و خوشك و برایێن مه‌ یێن موسلمان و ئێزدى و كریستیان و پێشمه‌رگێن پارێزه‌رێن كوردستانێ ب هه‌مى پێكهاتێن وان ڤه‌، پرسه‌ و سه‌ره‌خوه‌شیێن خوه‌ ئاراسته‌ی مالباتێن خودێ ژێ ڕازییان یێن كو د كاره‌ستا دلته‌زینا باژێڕێ سلێمانیێ دا گیانێ خوه‌ ژده‌ستداین و هه‌مى خه‌لكێ پارێزگه‌ها سلێمانیێ دكه‌ین و ئه‌م هه‌ڤخه‌مێن واناینه‌ و خودایێ مه‌زن و دلۆڤان سه‌بر و هه‌داراێ بده‌ته‌ هه‌موو لایه‌كى و سلامه‌تیێ بۆ بریندارێن ڤێ كاره‌ساتێ فریكه‌ت، هه‌ر ل رۆژا ئێكێ یا ڤێ بوویه‌رێ ژى من ب رێیا ته‌له‌فۆنێ په‌یوه‌ندى ب جه‌نابێ پارێزگارێ سلێمانیێ كر و به‌رهه‌ڤیا پارێزگه‌ها دهۆكێ و خه‌لكێ وێ بۆ هه‌ر هاریكاریه‌كێ دیار كر، ژ به‌ر كو چو جوداهى د ناڤبه‌را هیچ پارێزگه‌هه‌كا هه‌رێما كوردستانێ دا نینه‌ خۆشی و نه‌خۆشیێن وان هه‌ر یێن مه‌نه‌ و هیڤیدارین چو نه‌خۆشیێن دى بۆ خه‌لكێ باژێرێ سلێمانیێ و چو باژێر و باژارۆكێن دى یێن هه‌رێما كوردستانێ په‌یدا نه‌بن و نوكه‌ ژى پارێزگه‌ها سلێمانیێ پێدڤى ب هه‌ر هاریكاریه‌كێ ببیت ئه‌م وه‌كو پارێزگه‌ها دهۆكێ د به‌رهه‌ڤین هاریكاریا وان بكه‌ین".

 

 

رێوار محه‌مه‌د ره‌شید