سەرۆکی حکومەت پێشوازی لە سەرۆککۆماری عێراق دەکات
ئەمڕۆ سێشەممە 15ی تشرینی دووەمی 2022، مەسرور بارزانی، سەرۆکی حکومەتی هەرێمی کوردستان پێشوازیی لە لەتیف ڕەشید، سەرۆککۆماری عێراق کرد.
لە کۆبوونەوەکەدا، گفتوگۆ دەربارەی دوایین گۆڕانکاری و پێشهاتەکانی عێراق و ناوچەکە و گرنگیی چارەسەرکردنی کێشەکانی نێوان هەرێمی کوردستان و حکومەتی فیدراڵی، بە شێوەیەکی بنەڕەتی و لە سەر بنەمای دەستوور و لە چوارچێوەی کارنامەی وەزاری حکومەتی نوێی فیدراڵ کرا. جەختیش لەوە کرایەوە کە شاندێکی حکومەتی ھەرێمی کوردستان، سەردانی بەغدا دەکات بە مەبەستی دەستپێکردنەوەی گفتوگۆ و دانوستان لەبارەی چارەسەرکردنی کێشەکان.
لە تەوەرێکی دیکەی کۆبوونەوەکەدا، باس لە گرنگیی پاراستنی ئاسایش و سەقامگیری و سەروەریی عێراق کرا.
