بەهۆی بوونی ئەمنیەت و سەقامگیرییەوە ئیمارات لە هەرێمی کوردستان کاری وەبەرهێنان دەکات

هەولێر -KDP.info- بەڕێوەبەری گشتیی مۆڵەت لە دەستەی وەبەرهێنانی هەرێمی کوردستان گوتی، پەیوەندیی ئابووریی نێوان هەرێمی کوردستان و ئیماراتی یەکگرتووی عەرەبی لە ئاستێکی زۆر باشدایە و بەهۆی پەیوەندیی پتەو لەگەڵ هەرێم و بوونی ئەمنیەت و سەقامگیری لە هەرێمی کوردستان، ئیمارات دەیەوێت بەردەوام لە هەرێمی کوردستان پڕۆژە جێبەجێ بکات و ئێستا قەبارەی وەبەرهێنان لە نێوان هەرێم و ئێماراتدا دەگاتە دوو ملیار و500 ملیۆن دۆلار.

بەڕێوەبەری گشتیی مۆڵەت لە دەستەی وەبەرهێنانی هەرێمی کوردستان، هەڤاڵ سدیق، بۆ ماڵپەڕی فەرمیی پارتی دیموکراتی کوردستان گوتی: ''پەیوەندیی نێوان هەرێمی کوردستان و ئیماراتی یەکگرتووی عەرەبی لە بواری وەبەرهێناندا زۆر باشە و ئیمارات بەردەوام لە هەرێمی کوردستان پڕۆژە جێبەجێ دەکات و ئێمە سوود لە ئەزموونی ئەوان وەردەگرین و گرنگیی زۆر بە هەرێمی کوردستان دەدەین، چونکە پەیوەندیمان زۆر باشە و سەرۆکی حکوومەت سەردانی ئەوانی کردووە و سەرۆکی دەستەی وەبەرهێنانیش سەردانی ئیماراتی کرد، بۆیە دەمانەوێت بێن لە هەرێمی کوردستان پڕۆژە جێبەجێ بکەن.

هەڤال سدیق گوتیشی: ''پەیوەندیی پتەوی نێوان هەرێمی کوردستان و ئیمارات و سەقامگیری و ئەمنیەتی هەرێمی کوردستان وای کردووە کە ئیمارات بێت لە هەرێمی کوردستان پڕۆژە جێبەجێ بکات، ئەوان ئەزموونێکی باشیان هەیە و ئێمەش داوامان لێ کردوون بێن لە هەرێمی کوردستان کار بکەن.''

سدیق باسی لەوەش کرد: ''قەبارەی وەبەرهێنان لە نێوان هەرێمی کوردستان و ئیمارات دەگاتە دوو ملیار و 500 ملیۆن دۆلار و بەردەوامیشن لە ئەنجامدانی پڕۆژەی نوێ لە هەرێمی کوردستان.''

 

بڵند ئیبراهیم