دەست ب قێرکرنا 42 جادێن نوی ل دهۆکێ هاتەکرن

دهۆک-KDP.info- بەرپرسێ پەیوەندی و ڕاگەهاندنێ ل سەرۆکاتیا باژێرڤانیا دهۆکێ ئاشکرا کر کو پشتی ل هەیاما بوری دەست ب ڤەکرنا 42 جادێن د ناڤ سەنتەرێ باژێڕێ دهۆکێ دا هاتیەکرن، نوکە قووناغا قێرکرنێ ل ڤان جادان دەستپێکریە و دێ کەڤنە د خزمەتا وەلاتیان دا.

ئیسماعیل مستەفا، بەرپرسێ پەیوەندی و ڕاگەهاندنێ ل سەرۆکاتیا باژێرڤانیا دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو 42 جادێن نوی ل سەنتەرێ باژێرێ دهۆکێ ل سنوورێ باژێرڤانیا رۆژهەلات و رۆژئاڤا هاتینە ڤەکرن و نوکە دەست ب قێرکرنا ڤان جادان هاتیەکرن و گۆت: "چار ملیار و 624 ملیۆن و 87 هزار دینار بۆ ڤی پرۆژەیی هاتینە تەرخانکرن کو ئەڤ پرۆژە ژ لایێ کۆمپانیەکا کەرتێ تایبەت ڤە ب سەرپەرشتیا ئەندازیارێن سەرۆکاتیا باژێڕڤانیا دهۆکێ دهێتە ئەنجامدان".

ناڤهاتی ئاماژە دا وێ چەندێ کو هەر د چارچۆڤێ وان پرۆژان دا یێن کو ژ لایێ سەرۆکاتیا باژێرڤانیا دهۆکێ ڤە دهێنە ئەنجامدان نوکە دەست ب پرۆژێ ڤەکرن و کونکرتکرنا دو جادان ل تاخێ بەرۆشکێ یێ د ناڤ سەنتەرێ باژێرێ دهۆکێ دا هاتیەکرن و کوژمێ 40 ملیۆن و 759 ملیۆن دینار بۆ ڤی پرۆژەی هاتینە تەرخانکرن، د هەمان دەم دا رێڤەبەریا ئەندازەیا پارکان یا سەر ب سەرۆکاتیا باژێرڤانیا دهۆکێ نوکە دەست ب چێکرنا باخچەکی ل تاخێ شاخکێ یێ د ناڤ سەنتەرێ باژێرێ دهۆکێ دا کریە ب کوژمێ 61 ملیۆن و 210 هزار دیناران ژ داهاتێ باژێرڤانیا ناڤهاتی.

رێوار محەمەد رەشید