حکوومەت گەنمی بنەتۆو بە ٨٠٠ ھەزار دینار دەداتە جووتیاران
ھەولێر-KDP.info- بەڕێوەبەری چاندن و بنەتۆو لە وەزارەتی کشتووکاڵی حکوومەتی ھەرێمی کوردستان گوتی، دەست بەدابەشکردنی گەنمی بنەتۆو بەسەر جووتیاران دەکرێت کە نمرە یەکە و بەنرخێکی ھەرزانتر لەبازاڕ دەدرێتە جووتیاران، کە لەبازاڕ بەملیۆنێک و ١٥ ھەزار دینارە، واتا حکوومەت بە ٨٠٠ ھەزار دەیداتە جووتیاران.
رێژین سدقی، بەڕێوەبەری چاندن و بنەتۆو لە وەزارەتی کشتووکاڵی حکوومەتی ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی: "ئامادەکاری کراوە لەم ھەفتەیە گەنمی بنەتۆو بەسەر جووتیاران دابەش بکرێت کە لەرێگەی پارێزگاکانەوە دەبێت و گەنمەکە بۆ ھەر پارێزگایەک نزیکەی ھەزار و ٨٠٠ تەن دانراوە و ئەوانیش بەپێی رێنمایەکان بەسەر جووتیارانی دابەش دەکەن".
سدقی ڕوونیشیکردەوە: "بڕیارە ھەرتەنێک گەنمی بنەتۆو بە ٨٠٠ ھەزار دینار بدرێتە جووتیاران و حکوومەت ٢١٥ ھەزار دینار بۆ ھەر تەنێک پاڵپشتی جووتیاران دەکات، چونکە ھەر تەنێک گەنمی بنەتۆو لەبازاڕ نرخەکەی ملیۆنێک و ١٥ ھەزار دینارە، واتا ٨٠٠ ھەزار جووتیار دەیدات و ٢١٥ ھەزار دیناریش حکوومەت دەیدات و ئەو گەنمەش زیاتر دەدرێتە ئەو جووتیارانە کە خاوەن ئەزموونن و بتوانن بەشێوەیەکی باش گەنم بچێنن و پارێزگاری لێ بکەن، بۆ ئەوەی بەرھەمی باش بێت چونکە ئەو گەنمەی دەدرێتە جووتیاران نمرە یەکە و زۆر باشە".
رێژین سدقی گوتیشی: "ھاتنی ئەو شەپۆڵەی باران بارین زۆر گرنگە بۆ وەرزی چاندن و ئەگەر زیاتر ببارێت سوودی زیاتریشی دەبێت و باران بارین وا دەکات کە وەرزی چاندنیش پێشبخرێت، چونکە چەند زوو باران ببارێت جووتیارانیش زووتر دەست بەچاندن دەکەن، بۆیە ساڵانە زیاتر لە مانگی ١١ دەست بەچاندن دەکرێت".
بڵند ئیبراھیم
