كوربه‌ندێ چاوانیا ناساندنا تاوانێن جینۆسایدێن كوردان ل دهۆكێ هاته ئه‌نجامدان
دهۆك-KDP.info- رێڤه‌به‌رێ سه‌نته‌رێ ڤه‌كۆلینێن جینۆسایدێ ل زانكۆیا دهۆك دیار كر كو ب مه‌ره‌ما زێده‌تر دانه‌نیاسینا باده‌كێن تاوانێن جینۆسایدێن كوردان ئه‌ڤرۆ رۆژا دووشه‌مبى 17/10/2022 كوربه‌ندێ چاوانیا ناساندنا تاوانێن جینۆسایدێن كوردان ل زانكۆیا دهۆك هاته ئه‌نجامدان و ده‌رئه‌نجامێن ڤى كوربه‌ندى دێ بۆ جهێن په‌یوه‌ندیدار هێنه ئاراسته‌كرن.
د. سالم جاسم، رێڤه‌به‌رێ سه‌نته‌رێ ڤه‌كۆلینێن جینۆسایدێ ل زانكۆیا دهۆك بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو لایه‌نێن په‌یوه‌ندیدار ب بابه‌تێ جینۆسایدێ ڤه ژ قوربانیان و كه‌سێن ئه‌كادیمى و یاسایى و په‌رله‌مانتار و هتد... د ڤى كوربه‌ندى دا ئاماده‌ببوون بۆ وێ چه‌ندێ بشێن تاوانێن جینوسایدێن ب سه‌ر كوردان دا هاتین پتر بده‌ینه نیاسین بتایبه‌تى بۆ خه‌لكێ بیانى و ئه‌ڤ بابه‌ته پتر د بیردانكا مه كوردان دا زیندى بمینیت و نه‌هێنه ژبیركرن.ناڤهاتى ئاماژه دا وێ چه‌ندێ كو پشتى د ڤى كوربه‌ندى دا چه‌ندین دانوساندنێن ڤه‌كرى هاتینه ئه‌نجامدان و چه‌ندین سمینار هاتینه پێشكێشكرن گه‌هشتنه وى ده‌رئه‌نجامى كو پێدڤیه باده‌كا جینۆسایدێ هه‌ر ب زیندى بمینیت و كاره‌كێ باشتر و ب رێكوپێكتر بۆ ناساندنا تاوانێن ڤان جینۆسایدان بهێته ئه‌نجامدان بۆ وێ چه‌ندێ قوربانیێن ڤان تاوانان بهێنه قه‌ره‌بووكرن، هه‌روه‌سا ئه‌و ده‌ستهه‌لاتێن ئه‌ڤ تاوانه ئه‌نجامداین بهێنه دادگه‌هكرن و گۆت: "په‌رله‌مانتار ژى د ڤى كوربه‌ندى دا ئاماده‌ببوون بۆ وێ چه‌ندێ پێكڤه كاربكه‌ین و مفا بۆ پرۆژه‌یا یاسایان ل دۆر باده‌كێن تاوانێن جینوسایدێ ژ خالێن ڤى كوربه‌ندى بهێته وه‌رگرتن و ل رۆژێن داهاتى ده‌رئه‌نجامێن ڤى كوربه‌ندێ یێ كو ژ لایێ سه‌نته‌رێ ڤه‌كۆلینێن جینۆسایدێ ل زانكۆیا دهۆك ب هه‌ماهه‌نگى دگه‌ل ناڤه‌ندا خانى یا ره‌وشه‌نبیرى و راگه‌هاندنێ و رێكخراوا نێڤده‌وله‌تى یا قوربانیێن جینوسایدا كوردان (AMVGK) هاتیه ئه‌نجامدان دێ ب شێوه‌یێ ڕاپۆرت بۆ هه‌مى جه و لایه‌نێن په‌یوه‌ندیدار هێته ئاراسته‌كرن".
رێوار محه‌مه‌د ره‌شید
