42 جادە دێ ل باژێڕێ دهۆکێ هێنە ڤەکرن و قێرکرن
دهۆک-KDP.info-بەرپرسێ ڕاگەهاندنێ ل سەرۆکاتیا باژێڕڤانیا دهۆکێ دیار کر کو نوکە ب کوژمێ پتری چار ملیار دیناران کار د ڤەکرنا 42 جادەیان دا ل سنوورێ باژێرڤانیا رۆژهەلات و رۆژئاڤا ل باژێڕێ دهۆکێ یێ بەردەوامە و ل دەمەکێ نێزیک دێ کەڤنە د خزمەتا وەلاتیان دا.
ئیسماعیل مستەفا، بەرپرسێ ڕاگەهاندنێ ل سەرۆکاتیا باژێڕڤانیا دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو د بەردەوامیا وان پرۆژێن خزمەتگۆزاری دا یێن کو ل سەر دەمێ کابینا نەهێ یا حکومەتا هەرێما کوردستانێ دهێنە بجهئینان نوکە دەست ب پرۆژێ ڤەکرن و قێرکرنا 42 جادەیان ل سنوورێ باژێرڤانیا رۆژهەلات و رۆژئاڤا ل باژێرێ دهۆکێ هاتیەکرن.
ناڤهاتی ئاماژە دا وێ چەندێ کو ئەڤ پرۆژە ل سەر بۆدجا پارێزگەها دهۆکێ یا سالا 2022 ب کوژمێ چار ملیار و 624 ملیۆن و 87 هزار دیناران دهێتە بجهئینان و گۆت: "دەمێ ب دووماهی هاتنا ڤی پرۆژەیی 360 رۆژن و ئەندازیارێن سەرۆکاتیا باژێرڤانیا دهۆکێ سەرپەرشتیا ڤی پرۆژەیی دکەن".
بەرپرسێ ڕاگەهاندنێ ل سەرۆکاتیا باژێڕڤانیا دهۆکێ خویا کر کو سەرەرایی کار د بجهئینانا ڤی پرۆژەیی دا نوکە چەندین جادە و کولانێن باژێڕێ دهۆکێ دهێنە کونکریتکرن، هەروەسا دیوارێن پالپشت ژی ل چەندین جهان یێن دهێنە چێکرن و گۆت: "هەمی بزاڤ ژ لایێ مە ڤە یێن دهێنەکرن رێژا کەسکاتیێ ژی د ناڤ باژێڕێ دهۆکێ دا زێدەتر لێ بکەین".
رێوار محەمەد رەشید
