سوبه‌هى مه‌زنترین و ئێكه‌مین پاركا شینوارى ل سه‌ر ئاستێ عیراقێ و هه‌رێمێ دێ ل دهۆكێ هێته ڤه‌كرن
دهۆك-KDP.info- د رێوره‌سمه‌كى دا سوبه‌هى رۆژا ئیكشه‌مبى 16/10/2022 رێڤه‌به‌ریا شینواران ل پارێزگه‌ها دهۆكێ دگه‌ل زانكۆیا ئودونى یا ئیتالى دێ قووناغا ئێكێ یا مه‌زنترین و ئێكه‌مین پاركا شینوارى ل سه‌ر ئاستێ عیراقا فیدڕال و هه‌رێما كوردستانێ ل پارێزگه‌ها دهۆكێ ڤه‌كه‌ن.
د. بێكه‌س بریفكانى، رێڤه‌به‌رێ شینواران ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو قووناغا ئێكێ یا مه‌زنترین و ئیكه‌مین پاركا شینوارى ل سه‌ر ئاستێ عیراقا فیدڕال و هه‌رێما كوردستانێ سوبه‌هى دێ ل پارێزگه‌ها دهۆكێ هێته ڤه‌كرن كو رووبه‌رێ ڤێ پاركێ 130 كیلومه‌ترێن دووجارن و گۆت: "ئه‌ڤ پاركه پێنج جهێن شینوارى ب خوه‌ڤه دگریت وه‌كو (خنس، جه‌روانه، به‌نده‌وایه، فه‌یدیێ، شكه‌فتا هه‌لامه‌تان)".
ناڤهاتى ئاماژه دا وێ چه‌ندێ كو ئه‌ڤ پاركه نه‌بتنێ دێ جهه‌كێ شینوارى بیت، به‌لكو دێ سه‌نته‌ره‌كێ ره‌وشه‌نبیرى ژى بیت هه‌مى مۆزه‌خانه و چالاكى و پارك و روناهى و تابلۆیێن شلۆڤه‌كرنێ و جهێن شینوارى دێ د ناڤ ڤێ پاركێ دا هێنه نیشادان و گۆت: "قووناغا ئێكێ یا ڤێ پاركێ دێ ل ناحیا فه‌یدیێ یا سه‌ر ب پارێزگه‌ها دهۆكێ ڤه هێته ڤه‌كرن كو ئه‌و جوكا نێزیكى 10 کیلومەتران درێژ ل بن ئه‌ردى هاتیه دیتن 13 نه‌خش د ناڤ وێ جوكێ دا هاتینه نكراندن كو وێنێن پاشایان و خوداوه‌ندان ل سه‌ر هاتینه چێكرن".
رێوار محه‌مه‌د ره‌شید
