د سالڤه‌گه‌ڕا ئێكێ یا ڕاگه‌هاندنا ئیدارا سه‌ربه‌خۆ یا زاخۆ دا چ كار و پرۆژه هاتینه ئه‌نجامدان؟
دهۆك -KDP.info- پشتى بۆرینا نێزیكى ساله‌كێ ژ ڕاگه‌هاندنا ئیدارا سه‌ربه‌خۆیا زاخۆ ژماره‌كا مه‌زن یا پرۆژێن خزمه‌تگۆزارى یێن گرنگ ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ ل سنوورێ ئیدارا ناڤهاتى هاتینه ئه‌نجامدان و ب دووماهى هاتینه كه‌فتینه د خزمه‌تا خه‌لكێ ده‌ڤه‌رێ دا، هه‌روه‌سا هنده‌ك پرۆژێن دى ژى نوكه د قووناغا بجهئینانێ دانه و سه‌ره‌رایى ڤێ چه‌ندێ به‌رده‌وام پرۆژێن نوى یێن خزمه‌تگۆارى ل هه‌مان ئیداره دهێنه ڕاگه‌هاندن ژ پێخه‌مه‌ت به‌رژه‌وه‌ندیا گشتى یا وه‌لاتیان.
فه‌رهاد مه‌حمود، قایمقامێ قه‌زا باتیفا یا سه‌ر ب ئیدارا سه‌ربه‌خۆ یا زاخۆ ڤه بۆ ماڵپه‌رێ فه‌رمیێ پارتى دیموكراتى كوردستان دیار كر كو د ده‌مێ نێزیكى ساله‌كێ دا ژ ڕاگه‌هاندنا ئیدارا سه‌ربه‌خۆیا زاخۆ كوژمێ هه‌شت ملیار دیناران بۆ قووناغا ئێكێ یا بجهئینانا پرۆژێن خزمه‌تگۆزارى یێن جوراوجور ل سنوورێ قه‌زا باتیفا هاتینه ته‌رخانكرن، هنده‌ك ژ ڤان پرۆژان كار د بجهئینانا وان دا ب دووماهى هاتیه و نوكه كه‌فتینه د خزمه‌تا وه‌لاتیان دا و هنده‌ك پرۆژێن دى ژى نوكه د قووناغا بجهئینانێ دانه و رێژێن باش یێن كاركرنێ تێدا هاتینه ئه‌نجامدان و سه‌ره‌رایى ڤێ چه‌ندێ ل ده‌مه‌كێ نێزیك هنده‌ك پرۆژێن دى یێن خزمه‌تگۆزارى دێ ل هه‌مان قه‌زا هێنه راگه‌هاندن، هه‌روه‌سا د قووناغا دووێ یا پرۆژێن خزمه‌تگۆزارى دا دێ نه‌خۆشخانه‌كا مه‌زن یا سه‌رده‌مانه ل سه‌نته‌رێ قه‌ا باتیفا هێته چێكرن و ره‌زامه‌ندى ژى بۆ بجهئینانا ڤى پرۆژه‌ى هاتیه وه‌رگرتن و نوكه مژوولى بجهئینانا رێكارێن كارگێرى نه، ژ بلى ڤى پرۆژه‌یى جووتسایدێن سه‌ره‌كى یێن قه‌زایێ و رێكێن گوندان ژى دێ هێنه ڤه‌كرن و سه‌خبێركرن و گۆت: "ل قه‌زا باتیفا ئه‌م به‌هرا پتر گرنگیێ دده‌ینه چێكرنا پرۆژێن د بوارێن ئاڤ و كاره‌ب و رێ و بانان دا، ژ به‌ر كو ڤان پرۆژان پتر په‌یوه‌ندى یا ب ژیانا خه‌لكى ڤه هه‌یى، به‌لێ پرۆژێن دى یێن جوراوجور ژى به‌رده‌وام دهێنه چێكرن".
ناڤهاتى ئاماژه دا وێ چه‌ندێ كو د هه‌یڤا ئوكتوبه‌را ئه‌ڤ ساله دا دێ باتیفا د كوربه‌نده‌كێ گه‌شتیارى دا ب بڕیارا (گوهدار شێخۆ) سه‌رپه‌رشتێ ئیدارا سه‌ربه‌خۆ یا زاخۆ وه‌كو قه‌زایه‌كا گه‌شتیارى ل سنوورێ ئیدارا ناڤهاتى هێته ڕاگه‌هاندن، هه‌روه‌سا بڕیار هاتیه‌دان چار رێڤه‌به‌ریێن نوى ژ وان (تۆماركرنا خانوبه‌ران، گه‌شتوگۆزار، چاڤدێریا جڤاكى، دادنووس) ل قه‌زا باتیفا بهێنه ڤه‌كرن و نوكه مژوولى بجهئینانا رێكارێن پێدڤى نه بۆ ڤه‌كرنا ڤان رێڤه‌به‌ریان، به‌لێ ب شێوه‌یه‌كێ گشتى 22 فه‌رمانگه‌ه و هوبه و رێڤه‌به‌رى ل سنوورێ قه‌زا باتیفا هه‌نه و گۆت: "مه ب لیسته‌كێ داخوازا دامه‌زراندنا پترى 100 فه‌رمانبه‌ران ژ جڤاتا وه‌زیرێن حكومه‌تا هه‌رێما كوردستانێ كریه كو كار ل ڤان رێڤه‌به‌ریێن نوى و ئه‌و هوبێن نوى یێن كو د پلان دایه ل ناحیا بێگۆڤا بهێنه ڤه‌كرن بكه‌ن".
ژ ئالیێ خوه ڤه ئه‌ندازیار جه‌گه‌رخوین تاهر، رێڤه‌به‌رێ گشتى یێ وه‌به‌رهێنانێ ل ئیدارا سه‌ربه‌خۆ یا زاخۆ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو نوكه 36 پرۆژێن وه‌به‌رهێنانێ ل سنوورێ ئیدارا سه‌ربه‌خۆیا زاخۆ هه‌نه و ئه‌و به‌رده‌وام دوڤچوون و چاڤدێریا وان پرۆژان دكه‌ن، به‌لێ ژ ده‌ستپێكا دامه‌راندنا رێڤه‌به‌ریا گشتى یا وه‌به‌رهێنانێ ل ئیدارا ناڤهاتى و هه‌تا نوكه 80 پرۆژه گه‌هشتینه رێڤه‌به‌ریا وان بۆ وێ چه‌ندێ مۆله‌تا وه‌به‌رهێنانێ پێ بهێته‌دان و نوكه ئه‌ڤ پرۆژه د قووناغێن جوداجودا یێن بجهئینانا رێكاران دانه، ژ به‌ر ڤێ چه‌ندێ هه‌تا نوكه چو ژ ڤان پرۆژان مۆله‌تا وه‌به‌رهێنانێ وه‌رنه‌گرتیه، به‌لێ ب زووترین ده‌م دێ مۆله‌ت ب ژماره‌كا ڤان پرۆژان هێته‌دان و هێنه راگه‌هاندن و گۆت: "ب رێژا 99% یا وان كه‌سێن ئه‌ڤ پرۆژه پێشكێشكرین وه‌به‌رهێنه‌رێن ناڤخۆیى نه بتنێ دو پرۆژه ژ لایێ وه‌به‌رهێنه‌رێن بیانى ڤه هاتینه پێشكێشكرن ئێك ژوان وه‌به‌رهێنه‌ره‌كێ ئیماراتى یه دێ پرۆژه‌كێ چاندنێ چێكه‌ت و وه‌به‌رهێنه‌ره‌كێ دى ژى یێ وه‌لاتێ توركیا یه دێ پرۆژه‌كێ پیشه‌سازى چێكه‌ت، ئه‌ڤه دده‌مه‌كى دایه مه وه‌به‌رهێنه‌رێن خودان سه‌رمایه‌كێ باش ئاگه‌هداركرینه كو هه‌كه پرۆژێن وه‌به‌رهێنانێ ل ئیدارا سه‌ربه‌خۆ یا زاخۆ ئه‌نجام بده‌ن هه‌مى ئاسانكارى دێ بۆ وان د چارچۆڤێ یاسایێ دا هێنه‌كرن".
ناڤهاتى ئاماژه دا وێ چه‌ندێ كو ئه‌و ئه‌ردێ بۆ پرۆژێن وه‌به‌رهێنانێ دهێته ته‌رخانكرن یێ رێڤه‌به‌ریا گشتى یا وه‌به‌رهێنانێ نینه، به‌لكو یێ هنده‌ك وه‌زاره‌تێن دى یه و هه‌تا ڕه‌زامه‌ندیا وان وه‌زاره‌تان دهێته وه‌رگرتن بۆ وێ چه‌ندێ وى ئه‌ردى بده‌ستخوه‌ڤه بینن ئه‌نجامدانا رێكارێن بجهئینانا پرۆژێن وه‌به‌رهێنانێ هه‌تا راده‌یه‌كى گیرۆ دبیت و گۆت: "مه پلانه‌كا ستراتیژى یا وه‌به‌رهێنانێ ل دووڤ كارناما كابینا نه‌هێ یا حكومه‌تا هه‌رێما كوردستانێ بۆ سنوورێ ئیدارا سه‌ربه‌خۆ یا زاخۆ دانایه، ژ وێ پلانێ ژى مه جهه‌ك بۆ ده‌ڤه‌ره‌كا پیشه‌سازى ل سه‌ر رووبه‌رێ 800 دونه‌مێن ئه‌ردى ده‌ستنیشانكریه و نوكه مژوولى بجهئینانا دووماهى رێكارێن كارگێرى نه بۆ چیكرنا ڤێ ده‌ڤه‌رێ كو پێشبینى دهێته‌كرن پێنج هزار ده‌لیڤێن كارى بۆ خه‌لكێ مه ل ڤێ ده‌ڤه‌رێ په‌یداببن، هه‌روه‌سا پرۆژه‌كێ دى ل به‌رده‌ستێن مه هه‌یه شه‌ش هزار دونه‌مێن ئه‌ردى بۆ پرۆژێن چاندنێ هاتینه ته‌رخانكرن كو چار وه‌به‌رهێنه‌رێن خودان شیان ئه‌ڤ پرۆژه پێشكێشى مه كرینه و ئه‌م د قووناغێن دووماهیێ داینه بۆ بده‌ستڤه‌ئینانا ئه‌ردێ پرۆژه‌یى كو دو هزار و 500 جۆتیار دێ ژ ڤان پرۆژێن چاندنێ مفادار بن، هه‌روه‌سا سه‌رۆكێ حكومه‌تا هه‌رێما كوردستانێ و پشته‌ڤانیا ده‌سته‌یا گشتى یا وه‌به‌رهێنانێ ڕه‌زامه‌ندی هاتیه‌كرن بۆ ته‌رخانكرن كوژمێ ملیۆنه‌ك و 500 هزار دۆلاران بۆ ڤه‌دیتنا ده‌ڤه‌را حه‌سه‌ن ئاڤا ب رووبه‌رێ 10 هزار و 800 دونه‌مێن ئه‌ردى كو د پلان دایه ده‌ڤه‌ره‌كا بازرگانى و ده‌ڤه‌ركا پیشه‌ساى یا بچووك و ده‌ڤه‌ره‌كا گه‌شتوگۆارێ و ده‌ڤه‌ره‌كا ئاكنجیبوونێ ل سه‌ر ڤى رووبه‌رێ ئه‌ردى بهێنه چێكرن".
یونس محه‌مه‌د، سه‌رۆكێ باژێرڤانیا ئیدارا سه‌ربه‌خۆ یا زاخۆ بۆ ماڵپه‌رێ فه‌رمیێ پارتى دیموكراتى كوردستان دیار كر كو هه‌ر ژ ده‌ستپێكا ڕاگه‌هاندنا ئیدارا سه‌ربه‌خۆ یا زاخۆ و هه‌تا نوكه 26 پرۆژه ب كۆژمێ 14 ملیار و 744 ملیۆن و 323 هزار دیناران ل سنوورێ سه‌رۆكاتیا باژێرڤانیا ئیدارا سه‌ربه‌خۆ یا زاخۆ هاتینه ئه‌نجامدان و گۆت: "ئه‌ڤ پرۆژێن خزمه‌تگۆزاریێن د ده‌مێ دیاركرى دا هاتینه ئه‌نجامدان د جوراوجور بوون ژ وان پرۆژێن چێكرنا گۆرستانا زاخۆ و سولینان و باخچان و ڤه‌كرن و قێركرنا جادێن 30 مه‌ترى و كولانان و هتد..... هه‌روه‌سا چه‌ندین كارێن سه‌خبێریا پرۆژێن پێدڤى ژى د ده‌مێ بۆرى دا ژ لایێ سه‌رۆكاتیا باژێرڤانیا ناڤهاتى ڤه هاتینه ئه‌نجامدان".
رێوار محه‌مه‌د ره‌شید
