"گوندەکانی ئیدارەی سۆران ئاوەدان دەکرێنەوە"

سۆران -KDP.info- ئەمڕۆ ساڵێک بەسەر دەستبەکاربوونی ئیدارەی سەربەخۆی سۆراندا تێ دەپەڕێت و بەڕێوەبەری ڕاگەیاندنی ئیدارەی سەربەخۆی سۆرانیش دەڵێ، دوای دەستبەکاربوونی ئیدارەی سەربەخۆ چەندین پڕۆژەی ستراتیژی خراونەتە واری جێبەجێکردن و پلان ھەیە بۆ ئاوەدانکردنەوەی گوندەکانی سنووری ئیدارەی سەربەخۆی سۆران.

ھەژار حەکیم، بەڕێوەبەری ڕاگەیاندن و پەیوەندییەکانی ئیدارەی سەربەخۆی سۆران، بە ماڵپەڕی فەرمیی پارتی دیموکراتی کوردستانی ڕاگەیاند: "ساڵێکە ئیدارەی سەربەخۆی سۆران دەستبەکار بووە و دەیان پڕۆژەی خزمەتگوزاریی خستووەتە بواری جێبەجێکردن لە ماوەی دوو مانگی ڕابردوودا پڕۆژەکان ڕاگەیاندران و ٦٠%ی چوونەتە واری جێبەجێکردن، ئەمڕۆ بە ئامادەبوونی سەرۆکی حکوومەتی ھەرێمی کوردستان پڕۆژەیەکی دیکەی ستراتیژی کە جووتسایدی سپیلک- خەلیفان بوو بەردی بناغەی دانرا.''

بەڕێوەبەری پەیوەندییەکانی ئیدارەی سۆران دەشڵێت: "بڕیاری ئیدارەی سەربەخۆ کاریگەریی لەسەر بووژاندنەوەی سنوری سۆران ھەبووە، لەبەر ئەوەی جگە لە پڕۆژە بچووک و مامناوەندەکان سۆران پێویستی بە ڕێگای سەرەکی ھەبووە لەو چوارچێوەیەدا چەندین ڕێگا دەکرێنە جووتساید وەک ڕێگای حاجی ئومەران و ڕێگای سیدەکان و ڕێگای سۆران-رواندز و چەندین ڕێگای دیکەی ناوچەکە ھەمووی دەکرێنە جووتساید.''

ھەژار حەکیم ئاماژەی بۆ ئەوە کرد: "حەوت بەڕێوەبەرایەتیی گشتی لە سۆران کراونەتەوە و کارئاسانی بۆ ھاووڵاتیان کراوە و ڕوتین کەم کراوەتەوە، پلانێکی دیکەی ئیدارەی سۆران گەڕاندنەوەی خەڵکە بۆ گوندەکان تا وەبەرھێنان لە زەویی کشتوکاڵیی گوندەکانیان بکەن، یەکێک لە ئامانجەکانی ئیدارەی سەربەخۆی سۆران ئەوەیە گوندەکان ئاوەدان بکرێنەوە.''

 

قائید میرۆ