سه‌رۆكى هه‌رێمى كوردستان و باڵیۆزى قه‌ته‌ر كۆبوونه‌وه
ھەولێر-KDP.info- نیوه‌ڕۆى ئه‌مڕۆ سێشه‌ممه 2022/9/13 به‌ڕێز نێچیرڤان بارزانى، سه‌رۆكى هه‌رێمى كوردستان پێشوازى له به‌ڕێز خالد بن حه‌مه‌د ئه‌لسلێتى، باڵیۆزى قه‌ته‌ر له عێراق كرد.
له كۆبوونه‌وه‌یه‌كدا په‌یوندییه‌كانى عێراق و هه‌رێمى كوردستان له‌گه‌ڵ قه‌ته‌ر، دۆخى سیاسیى عێراق و دوایین پێشهاته‌كانى، هه‌وڵه‌كانى كردنه‌وه‌ى كونسولخانه‌ى گشتیى قه‌ته‌ر له هه‌ولێر له داهاتوودا، ده‌رفه‌ته‌كانى وه‌به‌رهێنانى قه‌ته‌رى له هه‌رێمى كوردستان و ئاماده‌كارییه‌كانى قه‌ته‌ر بۆ مۆندیالى جیهانى 2022 تاوتوێ كران.
هه‌ردوولا جه‌ختیان له خواستى قه‌ته‌ر و هه‌رێمى كوردستان بۆ بره‌ودانى زیاتر به په‌یوه‌ندییه‌كان و هاریكاریی هاوبه‌شى نێوانیان و ڕه‌خساندنى زه‌مینه‌ى له‌بار بۆ وه‌به‌رهێنانى قه‌ته‌رى له كه‌رت و بواره جیاكاندا له هه‌رێمى كوردستان و عێراق كرده‌وه، هه‌روه‌ها باسیان لە گرنگیى گه‌شته‌كانى ڕاسته‌وخۆى هێڵى ئاسمانیى قه‌ته‌رى بۆ عێراق و هه‌رێمى كوردستان كرد.
گرنگیى ئارامى و سه‌قامگیریى سیاسیى عێراق بۆ ته‌واوى ناوچه‌كه، په‌یوه‌ندییه‌كانى عێراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه و چه‌ند پرسێكى دیكه‌ى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه بوو.
