پارێزگارێ دهۆکێ پرۆژێن نوی یێن خزمەتگۆزاری ل سێ قەزایان ڕاگەهاندن

دهۆک-KDP.info- د بەڕدەوامیا چێکرنا پرۆژێن نوی یێن خزمەتگۆزاری دا یێن کو ل سەردەمێ کابینا نەهێ یا حکومەتا هەرێما کوردستانێ دهێنە چێکرن، (پ.د.عەلی تەتەر) پارێزگارێ دهۆکێ ژمارەکا پرۆژێن نوی یێن خزمەتگۆزاری ل سێ قەزایێن ب سەر پارێزگەها دهۆکێ ڤە ڕاگەهاندن.

مللەت عسمەت، سکرتێرێ رۆژنامەڤانی یێ پارێزگارێ دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو ئەو پرۆژێن نوی یێن خزمەتگۆزاری یێن کو ژ لایێ پارێزگارێ دهۆکێ ڤە هاتینە ڕاگەهاندن دێ ل دەمەکێ نێزیک ل قەزایێن (ئاکرێ، بەردەرەش، شێخان) کەڤنە د بوارێ بجهئینانێ دا و گۆت: " پرۆژێن  قەزا ئاکرێ ب کۆژمێ دوو ملیار و 400 ملیۆن و 300 هزار دیناران دێ هێنە بجهئینان ژ وان پرۆژێ سەخبێریکرن و قێرکرنا چەند جادێن ناڤخۆ ل تاخێن نوی یێن ئاکرێ ب درێژاهیا سێ هزار و 370 مەتران و چێکرنا رێکێن ناڤخۆ ل سەنتەرێ ناحیا دینارتە، هەروەسا قێرکرنا جادا قوتابخانا تاخێ دەواجن و جادا قۆتابخانا پێکەسەر و کونکریتکرنا جادا تاخێ شەڤیلکا".

ناڤهاتی ئاماژە دا وێ چەندێ کو پرۆژێن قەزا بەردەرەش ملیارەک و 682 ملیون و 300 هزار دیناران دێ هێنە بجهئینان ژوان پرۆژان چێکرنا رێکێن ناڤخۆیی ل سەنتەرێ ناحیا کەلەک ب درێژاهیا ئێک کیلومەتر، چێکرنا رێکا ل ناحیا رۆڤیا ب درێژاهیا ٢٠٤٥ مەتر، چێکرنا سایدێ دووێ ژ چواریا خێلەکی سەنتەرێ بەردەرەش ب درێژاهیا ١کم و چێکرنا جادێن ناڤخۆ ل سەنتەرێ قەزا بەردەرەش ب درێژاهیا ١،٧کم و گۆت: "هەر د چارچۆڤێ وان پرۆژێن خزمەتگۆزاری دا یێن کو ژ لایێ پارێزگارێ دهۆکێ ڤە هاتینە ڕاگەهاندن پرۆژێن قەزا شێخان ب وژمێ ملیارەک و 563 ملیۆن دیناران دێ هێنە بجهئینان ژوان پرۆژێ قێرکرنا رێکێن ناڤخۆیی ل گەرەکا ملایین ل سەنتەرێ قەزا شێخان و سەخبێریکرن و قێرکرنا رێکێن ناڤخۆیی ل سەنتەرێ کۆمەلگەها چرەی و سەخبێریکرن و قێرکرنا رێکێن ناڤخویی ل سەنتەرێ ناحیا باعەدرێ".

 

رێوار محەمەد رەشید