سكرتێرى مه‌كته‌بى سیاسى پێشوازى له كونسوڵى گشتى به‌ریتانیا له هه‌رێمى كوردستان كرد
هه‌ولێر-KDP.info- ئه‌مرۆ له باره‌گاى مه‌كته‌بى سیاسى پارتی دیموكراتی كوردستان، فازڵ میرانى سكرتێرى مه‌كته‌بى سیاسى پێشوازى له (دیڤید هنت) كونسوڵى گشتى به‌ریتانیا له هه‌رێمى كوردستان و شاندى یاوه‌رى كرد.
له دیداره‌كه‌دا سكرتێرى مه‌كته‌بى سیاسى وێراى به خێرهێنانى میوانه‌كان باسى بارودۆخى هه‌رێمى كوردستان و عێراق و دواپێشهاته‌كان و ئاسته‌نگ و كۆسپه‌كانى به‌رده‌م پرۆسه‌ى سیاسى عێراق و كێشه و ناكۆكى لایه‌ن و هێزه‌كانی كرد و ئاماژه‌ى به‌وه‌دا كه گرنگه به سازان و دیالۆگ چاره‌سه‌رى كێشه‌كان بكرێت كه ئه‌نجامه‌كه‌ى جێگه‌ى ره‌زامه‌ندیى هه‌موو لایه‌ك بێت بۆ مسۆگه‌ركردنى ئاسایش و سه‌قامگیرى.
هه‌روه‌ها فازڵ میرانى هه‌ماهه‌نگى و هاوكارى هه‌موویانى به گرنگ زانى بۆ به‌ره‌و پێشه‌وه‌چوونى هه‌نگاوه‌كان و لابردنى كۆسپ و ته‌گه‌ره‌كان و جه‌ختی له سه‌ر دیالۆگى نیشتمانى بونیادنه‌رانه كرد و وه‌لانانى توندوتیژى و به‌گه‌ڕخستنى هه‌موو هه‌وڵێكى چاكخوازانه له پێناو ڕێگرى كردن له ته‌شه‌نه كردنى ناكۆكیه‌كان.
له لاى خۆیه‌وه كونسوڵى گشتى شانشینى یه‌كگرتوویی به‌ریتانیا سوپاسى سكرتێرى مه‌كته‌بى سیاسى كرد بۆ ئه‌م دیداره و پشتیوانى وڵاته‌كه‌ى دووپات كرده‌وه بۆ سه‌قامگیرى هه‌رێمى كوردستان و عێراق و جه‌ختى له سه‌ر گرنگى كێشه و گرفته‌كان كرد كه به لێكتێگه‌یشتن و گفتوگۆ چاره‌سه‌ر بكرێن له رێگاى دیالۆگه‌وه.
