رێكا چیایێ زاوا ل دهۆكێ هاته ڤه‌كرن
دهۆك-KDP.info-د به‌رده‌وامیا ڤه‌كرنا پرۆژێن نوى یێن خزمه‌تگۆزارى دا ل پارێزگه‌ها دهۆكێ ئه‌ڤرۆ رۆژا 25/7/2022 د رێوره‌سمه‌كى دا رێكا چیایێ زاوا یێ گه‌شتیارى ل باژێرێ دهۆكێ ژ لایێ (پ.د.عه‌لى ته‌ته‌ر) پارێزگارێ دهۆكێ ڤه هاته ڤه‌كرن.
د.عه‌لى ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانى دا ئاشكرا كر كو به‌رى نوكه پارچه‌ك ژ رێكا چیایێ زاوا یێ گه‌شتیارى ل دهۆكێ هاتبوو چێكرن، به‌لێ نوكه رێكا چیایێ ناڤهاتى ب درێژاهیا دو كیلۆمه‌تر و 300 مه‌تران ب تمامى ل سه‌ر بودجا تایبه‌ت یا پارێزگه‌ها دهۆكێ هاته ڤه‌كرن و گۆت: "ئه‌ڤ رێكه دێ گه‌له‌ك خزمه‌تا وه‌لاتى و گه‌شتیاران كه‌ت، ژ به‌ر كو چیایێ زاوا گه‌له‌ك نێزیكى باژێرێ دهۆكێ یه و دیمه‌نێن جوانێن چیایێ ناڤهاتى بووینه ئه‌گه‌ره‌ك كو رۆژانه ژماره‌كا مه‌زن یا وه‌لاتى و گه‌شتیاران بۆ بكه‌ن".
پارێزگارێ دهۆكێ ئاماژه دا وێ چه‌ندێ كو ماسته‌رپلانه‌كا باش یا گه‌شتیارى بۆ چیایێ زاوا هاتیه‌دانان و ل پاشه‌رۆژێ ئه‌ڤ چیایه دێ بیته جهه‌كێ گه‌شتیارى یێ ب رێكوپێك ل سه‌ر ئاستێ عیراقێ و هه‌رێما كوردستانێ و گۆت: "داخوازێ ژ خه‌لكێ مه و گه‌شتیاران دكه‌م ده‌مێ سه‌ره‌دانا چیایێ زاوا دكه‌ن ژینگه‌هێ بپارێزن".
پارێزگارێ دهۆكێ خویا كر كو به‌رده‌وام پرۆژێن نوى یێن خزمه‌تگۆزارى ل پارێزگه‌ها دهۆكێ دهێنه ڤه‌كرن و نوكه ژى رۆژانه پرۆژێن نوى یێن خزمه‌تگۆزارى ب مه‌ره‌ما بجهئینانێ دهێنه ره‌وانه‌كرن و به‌هرا پتر ژى ئه‌و پرۆژه‌نه یێن د به‌رژه‌وه‌ندیا گشتى دا و خه‌لك راسته‌وخۆ ژێ مفاداردبیت.
هه‌ژى گۆتنێ یه كو چیایێ زاوا ئێك ژ جهێن گه‌شتیارى یێن پارێزگه‌ها دهۆكێ یه ل سالا 2021 مه‌زنترین كومه‌لگه‌ها گه‌شتیارى كو ژ تلفریك و خوارنگه‌ه و جهێن بهێنڤه‌دانێ و باخچان پێك دهێت ژ لایێ سه‌رۆكێ حكومه‌تا هه‌رێما كوردستانێ ڤه ل چیایێ ناڤهاتى هاتبوو ڤه‌كرن.
رێوار محه‌مه‌د ره‌شید
