دارا جەلیل خەیات: ئەمساڵ جمووجۆڵی بازرگانی زۆر زیادی کردووە

ھەولێر-KDP.info- سەرۆکی یەکێتی ژوورەکانی بازرگانی لە ھەرێمی کوردستان گوتی، شاندی بازرگانی وڵاتان بە بەردەوامی و بەشێوەیەکی بەرچاو بەجۆرێکه‌ ھەفتانە دوو شاند سەردانمان دەکەن بۆ ئەوەی کاری بازرگانی و وەبەرھێنان لە ھەرێمی کوردستان ئەنجامبدەن، چونکە ھەرێمی کوردستان بۆ کارکردن لە ڕۆژھەڵاتی ناوەڕاست ناوچەیەکی تایبەتە و ئارامە بۆ کارکردن، بۆیە کۆمپانیاکان دەیانەوێت ئەو دەرفەتە بقۆزنەوە و لە ھەرێمی کوردستان کار بکەن.

سەرۆکی یەکێتیی ژوورەکانی بازرگانی لە ھەرێمی کوردستان، دارا جەلیل خەیات، بۆ ماڵپەڕی فەرمیی پارتی دیموکراتی کوردستان گوتی: "ئەمساڵ جمووجۆڵی بازرگانی لە ھەرێمی کوردستان بەشێوەیەکی بەرچاو زیادی کردووە و بەردەوام شاندی بیانی دێن لە وڵاتان سەردانمان دەکەن بۆ ئەوەی بتوانن لە ھەرێمی کوردستان دەرفەتیان بۆ برەخسێت و کاری بازرگانی و وەبەرھێنان بکەن و ھەر دوێنێش شاندێکی ئەوروپا سەردانی ئێمەیان کرد، کە کۆمپانیایەکی تێکەڵاو بوو، چونکە ھەرێمی کوردستان لە ڕۆژھەڵاتی ناوەڕاست تایبەتە بۆ ئەوان، بۆیە دەیانەوێت کارمان لەگەڵ بکەن و پەیوەندی دروست بکەن".

دارا جەلیل خەیات گوتیشی: "ھەفتانە دوو شاند سەردانمان دەکەن و زۆرینەی بیانین و دەیانەوێت ئەو فورسەتەی کارکردن لە ھەرێمی کوردستان ھەیە بقۆزنەوە و کار بکەن، ئێمەش ھەموو ئاسانکاریەکیان بۆ دەکەین چونکە ھەرێمی کوردستان دەرفەتی کارکردنی زۆرە و ئەوانیش مەبەستیانە لە ھەرێم کار بکەن".

خەیات باسی لەوەشکرد: "ئەمساڵ جمووجۆڵی بازرگانی بەراورد بەساڵی رابردوو زۆر زیادی کردووە، چونکە ھەرێمی کوردستان ناوچەیەکی ئارامە بۆ ئەوەی کۆمپانیا بیانیەکان بێن کاری تێدا بکەن بەراورد بە وڵاتانی ڕۆژھەڵاتی ناوەڕاست".

 

بڵند ئیبراھیم