15 کارگەهێن نوی یێن پیشەسازی دێ ل دهۆکێ هێنە ڤەکرن

دهۆک-KDP.info- سکرتێکرێ رۆژنامەڤانی یێ پارێزگارێ دهۆکێ ئاشکرا کر کو د بەردەوامیا ڤەکرنا کارگەهێن نوی یێن پیشەسازی دا ل پارێزگەها دهۆکێ ئەڤرۆ رۆژا چارشەمبی 20/7/2022 (پ.د.عەلی تەتەر) پارێزگارێ دهۆکێ رەزامەندی ل سەر ڤەکرنا 15 کارگەهێن نوی یێن پیشەسازی ل پارێزگەها دهۆکێ کر.

مللەت عسمەت، سکرتێکرێ رۆژنامەڤانی یێ پارێزگارێ دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو پشتی ئەڤرۆ کۆمبوونا لژنا گەشەپێدان و پشتگریا پیشەسازی ب سەرپەرشتیا (پ.د.عەلی تەتەر) پارێزگارێ دهۆکێ هاتیە ئەنجامدان، رەزامەندی ل سەر ڤەکرنا 15 کارگەهێن نوی یێن پیشەسازی ل پارێزگەها دهۆکێ هاتەکرن.

ناڤهاتی ئاماژە دا وێ چەندێ کو ئەو کارگەهێن ئەڤرۆ رەزامەندی ژ لایێ پارێزگارێ دهۆکێ ڤە ل سەر هاتیەکرن کو ئەرد بۆ بهێتە دابینکرن و بهێنەڤەکرن پێکدهێن ژ کارگەهێن "کارگەها بەرهەمئینانا گێچی، کارگەها بەرهەمئینانا فلینێ دیکۆرێن خانیا و کارگەها بوریێن پلاستیکی و کارگەها بەرهەمئینانا زەیتێ، چێکرنا هەمی جۆرێن موبیلیاتا، کونکریتێ ئامادە، درینا جلوبەرگا، دووبارە زڤراندن و شیشتنا هەمی جۆرێن پلاستیکی، بەرفرەهکرنا کارگەها چێکرنا حەلانی و کاشی، کارگەهەکا بەرهەمئینانا تەحینێ، کارگەها بەرهەمئینانا چیمەنتوی".

رێوار محەمەد رەشید