رووفاتی ١٠٠ جینۆسایدکراوی بارزانی دەگەڕێندرێتەوە ھەرێم
ھەولێر-KDP.info- بڕیارە رووفاتی ١٠٠ جینۆسایدکراوی بارزانی بگەڕێندرێنەوە کوردستان و بەڕێوەبەری راگەیاندنی وەزارەتی شەھیدان و ئەنفالکراوانیش دەڵێ، مەراسمێک بۆ ھێنانەوەی رووفاتی بارزانییەکان بەڕێوەدەچێت.
حاکم عادل، بەڕێوەبەری راگەیاندنی وەزارەتی شەھیدان و ئەنفالکراوان، بە ماڵپەڕی فەرمیی پارتی دیموکراتی کوردستانی راگەیاند: "بڕیارە رۆژی ٣٠ی ئەم مانگە رووفاتی ١٠٠ جینۆسایدکراوی بارزانی لە باشووری عێراقەوە بگەڕێندرێنەوە بۆ ھەرێمی کوردستان و دواتر لە زێدی خۆیان ئەسپاردەی خاکی پیرۆزی کوردستان بکرێن".
بەڕێوەبەری راگەیاندنی وەزارەتی شەھیدان و ئەنفالکراوانی گوتی: "مەراسیمێک بۆ ھێنانەوەی رووفاتی بارزانییەکان رێکدەخرێت و تێدا لایەنە پەیوەندارەکان و ھەرسێ سەرۆکایەتی ھەرێمی کوردستان بەشداری دەکەن دواتر بەڕێدەکرێن بۆ دەڤەری بازران".
رۆژی ٣١ی٧ی١٩٨٣، رژێمی بەعسی لەناوچوو لە ھەڵمەتێکی دڕندانەی دژ بە ھەموو بەھایەکی مرۆڤایەتی لە کۆمەڵگەکانی قوشتەپە و بەحرکە و ھەریر و دیانە ھەشت ھەزار ھاووڵاتی سڤیلی ئەنفالکرد و دواتر لە بیابانەکانی عێراق زیندە بەچاڵکران.
ھاوکات رێبوار بارزانی، بەڕێوەبەری شەھید و ئەنفالکراوانی بارزان، بە ماڵپەڕی فەرمیی پارتی دیموکراتی کوردستانی راگەیاند: "تا ئێستا زیاتر لە ٥٠٠ رووفاتی بارزانیەکان گەڕێندراونەتەوە خاکی باب و باپیران و ھەوڵەکان بۆ دۆزینەوە و ھێنانەوە ھەموو رووفاتەکان دەدرێت".
قائید میرۆ
