243 پرۆژێن نوى یێن خزمه‌تگۆزارى ل دهۆكێ هاتنه راگه‌هاندن
دهۆك-KDP.info- د به‌رده‌وامیا چێكرنا پرۆژێن نوى یێن خزمه‌تگۆزارى دا ل پارێزگه‌ها دهۆكێ یێن كو ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ دهێنه بجهئینانا ئه‌ڤرۆ رۆژا ئێكشه‌مبى د.عه‌لى ته‌ته‌ر پارێزگارێ دهۆكێ 243 پرۆژێن نوى یێن خزمه‌تگۆزارى ل سه‌رانسه‌رى پارێزگه‌ها دهۆكێ راگه‌هاندن.
پ.د.عه‌لى ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانى دا دیار كر كو پشتى كو ل حه‌فتیا بۆرى چه‌ندین پرۆژێن خزمه‌تگۆزارى ل پارێزگه‌ها دهۆكێ هاتینه راگه‌هاندن، خوشبه‌ختانه جه‌نابێ سه‌رۆكێ حكومه‌تا هه‌رێما كوردستانێ 243 پرۆژێن دى یێن خزمه‌تگۆزارى یێن جوراوجور ل پارێزگه‌ها دهۆكێ دیار كر كو ئه‌ڤ پرۆژه به‌رى نوكه ل سه‌ر هه‌مى قه‌زایێن پارێزگه‌ها دهۆكێ ب شێوه‌یه‌كێ دادپه‌روه‌رانه هاتینه به‌لاڤكرن و گۆت: "ئه‌ڤ پرۆژێن هاتینه راگه‌هاندن هه‌مى ئه‌و پرۆژه‌نه یێن كو رۆژانه خه‌لك پێدڤى دبیتێ كو پتر پرۆژێن رێك و بانان و ئاڤێ نه ب تایبه‌تى ئاڤا ڤه‌خوارنێ، هه‌روه‌سا چه‌ندین پرۆژێن په‌روه‌دێ و ساخله‌میێ ژى د ناڤ دا هه‌نه".
پارێزگارێ دهۆكێ ئاماژه دا وێ چه‌ندێ كو پرۆژێن ئه‌ڤرۆ دگه‌ل پرۆژێن ل حه‌فتیا بۆرى ل سنوورێ پارێزگه‌ها دهۆكێ هاتینه راگه‌هاندن دبنه نێزیكى 390 پرۆژان، ژبلى وان پرۆژان یێن كو هنده‌ك جاران ل دووڤ پێدڤیا ده‌ڤه‌ران دهێنه ئه‌نجامدان و گۆت: "پرۆژێن ئه‌ڤ ساله وه‌كو ژماره و كۆژمه ژى ژ پرۆژێن سالا بۆرى پترن، ئه‌ڤ پرۆژه ل دووڤ رێكاران دێ بنه ته‌نده‌ر و كه‌ڤنه د بوارێ بجهئینانێ دا، ژ به‌ر ڤێ چه‌ندێ داخوازێ ژ به‌لێنده‌ران ژى دكه‌ین كو د بجهئینانا ڤان پرۆژانه دا پشكداربن و پێگیریێ ب سۆزناما خوه بكه‌ن و ئه‌و رێككه‌فتنا دگه‌ل حكومه‌تێ ئیمزا دكه‌ن جێبه‌جێ بكه‌ن".
عه‌لى ته‌ته‌ر خویا كر كو پشتى ل هه‌یاما بۆرى سه‌رۆكێ حكومه‌تا هه‌رێما كوردستانێ سه‌ره‌دانا قه‌زا سێمێلێ كرى ل وێرێ پێشنیار كر كو دوو ناحیه بۆ قه‌زا سێمێلێ بهێنه زێده‌كرن ناحیه‌ك ژ وان كو به‌رى نوكه رازه‌مه‌ندى هه‌بوو ناحیا (خانكێ) بوو ناحیا دووێ ژى ناحیا (شاریا) بوو، به‌لێ ب مخابنى ڤه خه‌لكێ شاریا ئه‌ڤ پێشنیاره پێ خوه‌ش نه‌بوو كو شاریا ببیته سه‌نته‌رێ ناحیێ، به‌لێ رۆژێن داهاتى پشتى گرتنه‌به‌را رێكارێن پێدڤى (خانكێ) دێ بیته ناحیه و كارگێریا وێ دێ كه‌ڤیته كارى.
رێوار محه‌مه‌د ره‌شید
