عەبدوڵڵا ئاکرەیی: دوو بنکەی بازرگانیی ئێرانی لە هەرێمی کوردستان دەکرێنەوە
هەولێر -KDP.info- بەڕێوەبەری گشتیی پەیوەندییەکانی نێوان هەرێمی کوردستان و ئێران گوتی، بڕیارە دوو بنکەی بازرگانیی ئێرانی لە هەرێمی کوردستان بکرێتەوە کە سەرپەرشتیی کۆمپانیا ئێرانییەکان لە هەرێمی کوردستان دەکەن.
عەبدوڵڵا ئاکرەیی بۆ ماڵپەڕی فەرمیی پارتی دیموکراتی کوردستان گوتی: ''کونسوڵخانەی ئێران ئێمەی ئاگادار کردووەتەوە بنکەی بازرگانیی کۆماری ئیسلامیی ئێران لە سلێمانی دەکرێتەوە بە بەشداریی کۆمەڵێک کۆمپانیای پسپۆڕ و فەنی و هاوکات جێگری زانستیی سەرۆکایەتیی ئێرانیش بەشداری دەکەن''.
بەڕێوەبەری گشتیی پەیوەندییەکانی نێوان هەرێمی کوردستان و ئێران گوتیشی: ''ماوەیەکە ئێران داوای کردنەوەی ئەو بنکە بازرگانیانە دەکات کە بڕیارە ڕۆژی دووشەممە لە شاری سلێمانی بکرێتەوە.
عەبدوڵڵا ئاکرەیی ڕوونیشی کردەوە: بڕیارە جگە لە شاری سلێمانی لە هەولێریش بکرێتەوە، بەڵام ئەوەی سلێمانی ڕەزامەندیی لێ دراوە و ڕۆژی دووشەممە دەکرێتەوە.
گوتیشی: ئەو بنکانە سەرپەرشتیی کۆمپانیا بازرگانییەکانی ئێران لە هەرێمی کوردستان دەکەن.
بڵند ئیبراهیم
