سه‌رۆكى هه‌رێمى كوردستان له‌گه‌ڵ باڵیۆزى به‌ریتانیا كۆبووه‌وه
ھەولێر-KDP.info- سەرۆکی هەرێمی کوردستان رایگەیاند، چارەسەرکردنی کێشەکانی نێوان هەولێر و بەغدا کلیلی ئارامی و چارەسەری کێشەکانی عێراقە و "کێشەکان لە بەرژەوەندیی هیچ لایەنێکدا نین و کەس تێیدا براوە نابێت."
رۆژی پێنجشه‌ممه 30-06-2022 نێچیرڤان بارزانى، سه‌رۆكى هه‌رێمى كوردستان پێشوازى له مارك برایسۆن ریچاردسۆن، باڵیۆزى به‌ریتانیا له عێراق و شاندێكى یاوه‌رى كرد. له كۆبوونه‌وەیاندا دوایین پێشهاته‌كانى دۆخى عێراق و ئاڵەنگارییەکانی به‌رده‌م پرۆسه‌ى سیاسى، كێشه‌كانى هه‌ولێر ـ به‌غدا، دۆخى ناوخۆ و هه‌ڵبژاردنه‌كانى داهاتووى هه‌رێمى كوردستان، پرۆسه‌ى چاكسازى له وه‌زاره‌تى پێشمه‌رگه و یه‌كخستنه‌وه‌ى هێزه‌كانى پێشمه‌رگه و بره‌ودان به په‌یوه‌ندییه‌كانى به‌ریتانیا له‌گه‌ڵ عێراق و هه‌رێمى كوردستان، تاوتوێ كران.
بەپێی راگەیێندراوی سەرۆکایەتیی هەرێمی کوردستان، هه‌ردوولا كۆك بوون له‌سه‌ر گرنگیى گه‌یشتنى هێز و لایه‌نه عێراقییه‌كان به لێكگه‌یشتن بۆ تێپه‌ڕاندنى سه‌ختییه‌كانى به‌رده‌م پرۆسه‌ى سیاسى و پێویستیى پاراستنى سه‌قامگیریى ئه‌منى و سیاسى له وڵاتەکە، هه‌روه‌ها جه‌ختیان له پێویستیى باشتركردنى خزمه‌تگوزارییه‌كان له‌و وڵاتە كرده‌وه.
له‌باره‌ى كێشه‌كانى هه‌ولێر ـ به‌غداوه، نێچیرڤان بارزانى دووپاتیكرده‌وه، "چاره‌سه‌ركردنى كێشه‌كانى نێوان حكومه‌تى هه‌رێمى كوردستان و حكومه‌تى فیدراڵیى عێراق، كلیلى ئارامى و چاره‌سه‌رى كێشه‌كانى عێراقه و ئاڵۆزكردنى كێشه‌كان له به‌رژه‌وه‌ندیى هیچ لایه‌نێكدا نییه و كه‌س تێیدا براوه نابێت."
گرنگیى یه‌كڕیزیى لایه‌نه كوردستانییه‌كان له به‌غدا، هاریكارى و هه‌ماهه‌نگى له بوارى رووبه‌ڕووبوونه‌وه‌ى تاوان و مادده هۆشبه‌ره‌كاندا، پرسى كۆچ و كۆچبه‌ران و پێشهاته‌كانى ناوچه‌كه به‌گشتى، چەند تەوەرێکی دیكه‌ى كۆبوونه‌وەكه بوون.
