ئه‌ڤرۆ به‌رێ بنیاتى دێ بۆ مه‌زنترین پرۆژێ گه‌شتیارى ل زاخۆ هێته دانان
دهۆك –KDP.info- د رێوره‌سمه‌كى دا ئه‌ڤرۆ رۆژا سێشه‌مبى 28/6/2022 ل ده‌مژمێر 7:30 ئێڤارى دێ به‌رێ بنیاتى بۆ مه‌زنترین پرۆژێ گه‌شتیارى ب كوژمێ پترى 11 ملیار دیناران ل سنوورێ ئیدارا سه‌ربه‌خۆ یا زاخۆ هێته دانان.
چیا ئه‌مین، رێڤه‌به‌رێ گه‌شتوگۆزارێ ل ئیدارا سه‌ربه‌خۆ یا زاخۆ بۆ ماڵپه‌رێ فه‌رمیێ پارتى دیموكراتى كوردستان دیار كر كو د چارچۆڤێ وان پرۆژان دا یێن كو ل سه‌رده‌مێ كابینا نه‌هێ یا حكومه‌تا هه‌رێما كوردتانێ دهێنه بجهئینان ئه‌ڤرۆ دێ به‌رێ بنیاتى بۆ مه‌زنترین پرۆژێ گه‌شتیارى ب كوژمێ 11 ملیار و 500 ملیۆن دیناران ل سه‌ر بۆدجه‌یا حكومه‌تا هه‌رێما كوردستانێ ل ده‌وروبه‌رێن خابیرێ ئیدارا سه‌ربه‌خۆ یا زاخۆ هێته دانان و گۆت: "ئه‌ڤ پرۆژه دێ ژ لایێ كۆمپانیه‌كا بیانى ڤه كو شاره‌زاییه‌كا باش د چێكرنا پرۆژێن گه‌شتیارى دا هه‌یه هێته بجهئینان، ده‌مێ ب دووماهى هاتنا ڤى پرۆژه‌یى 15 هه‌یڤێن، به‌لێ كۆمپانیا جێبه‌جێكار سۆز دایه كو زووتر ژ وى ده‌مێ بۆ هاتینه ده‌ستنیشانكرن ڤى پرۆژه‌یى ب دووماهى بینیت كو ئه‌ڤ پرۆژه د قووناغا ئێكێ دا دێ ب درێژاهیا كیلۆمه‌تره‌كێ ل ده‌وروبه‌رێن خابیرێ ئیدارا سه‌ربه‌خۆ یا زاخۆ هێته چێكرن و ل سالا 2023ێ ژى دا د پلانا مه دایه ده‌ست بجهئینانا قووناغا دووێ یا ڤى پرۆژه‌یى بهێته‌كرن".
ناڤهاتى ئاماژه دا وێ چه‌ندێ كو به‌رى نوكه ئه‌و خه‌لكێ ئه‌ردێ وان كه‌فتیه به‌ر ڤى پرۆژه‌ى هاتینه قه‌ره‌بووكرن و گۆت: "چێكرنا پرۆژێن گه‌شتیارى یێن ب ڤى شێوه‌یى ل سنوورێ ئیدارا سه‌ربه‌خۆ یا زاخۆ دێ بیته ئه‌گه‌ره‌ك كو رێژا هاتنا گه‌شتیاران بۆ سنوورێ ئیدارا ناڤهاتى به‌ر ب زێده‌بوونێ ڤه بچیت، هه‌روه‌سا دێ بیته ئه‌گه‌ره‌كێ باش كو ب سه‌دان ده‌لیڤێن كارى ژى بۆ خه‌لكێ ده‌ڤه‌رێ د ناڤ ڤى پرۆژه‌یێ گرنگێ گه‌شتیارى دا په‌یداببن".
رێوار محه‌مه‌د ره‌شید
