گرێبەستا مەزنترین جھێ شوونواری ل دھۆکێ ھاتە ئیمزاکرن
دھۆکKDP.info- رێڤەبەرێ شوونوار و کەلەپووری ل پارێزگەھا دھۆکێ دیار کر کو گرێبەستا مەزنترین جھێ شوونواری (گرێ خەتارا) کو دکەڤیتە ناحیا فەیدیێ ل سنوورێ قەزا سێمێلێ یا سەر ب پارێزگەھا دھۆکێ ڤە ھاتە ئیمزاکرن.
د.بێکەس بریفکانی، رێڤەبەرێ شوونوار و کەلەپووری ل پارێزگەھا دھۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو گرێبەستا ھەلکۆلینێن شوونواری (گرێ خەتارا) کو دکەڤیتە ناحیا فەیدیێ ل سنوورێ قەزا سێمێلێ یا سەر ب پارێزگەھا دھۆکێ ڤە ل دووماھیا حەفتیا بۆری ب ئامادەبوونا (کەیفی مستەفا) رێڤەبەرێ گشتی یێ شوونوار و کەلەپوورا و (دانیال موراندی بوناکوسی) سەرۆکێ تیمێ زانکۆیا ئودینی یا ئیتالی و (میشێل کامیروتا) قۆنسلێ گشتی یێ وەلاتێ ئیتالیا ل ھەرێما کوردستانێ، ھاتە ئیمزاکرن و گۆت: "تیمەکێ ھەڤپشک د ناڤبەرا رێڤەبەریا شوونوار و کەلەپوورێن پارێزگەھا دھۆکێ و زانکۆیا ئودینی یا ئیتالی، ل سالا ٢٠٢١ رووپیڤەکا بەرفرەھـ ل سەر جھێ شوونواری (گرێ خەتارا) کر و د ئەنجام دا دیاربوو کو ژیان ھەر ژ چەرخێ نحاسی یێ کەڤن ھندەک پارچێن گوزا یێن سەردەمێ حەلەف ھەتا سەردەمێ ساسانی ل جھێ ناڤھاتی ھەبوویە و چو شوونوارێن ل سەردەمێ ئیسلامی نەھاتینە دیتن، ئەرکێ سەرەکی یێ تیمێ کوردی - ئیتالی د ناڤبەرا رێڤەبەریا شوونوار و کەلەپوورێن پارێزگەھا دھۆکێ و زانکۆیا ئودینی یا ئیتالی دێ ھەلکۆین و ڤەکۆلینێن زانستی ل سەر چەرخ و شارستانیەت و گورانکاریان بیت، ھەر ژ دووماھیا چەرخێ بەری نحاسی ھەتا سەردەمێ ساسانی و ھەروەسا زانینا چەرخێن مێژوویی ب رێیا کاربون ١٤، ژ بەر کو ھەتا نوکە مێژویا دروست یا گەلەک چەرخان ل پارێزگەھا دھۆکێ یا بەرزەیە ئەڤ ھەلکۆلینە دێ بیتە پێنگاڤەکا گرنگ بۆ کوردستانێ و ب تایبەتی پارێزگەھا دھوکێ".
ناڤھاتی ئاماژە دا وێ چەندێ کو گرێ خەتارا ئێک ژ جھێن شوونواری یێن مەزنە کو دکەڤیتە ل سەر لێڤا رۆژھەلاتێ گەلیێ (سن) ب دووراتیا سێ کم ژ گوندێ خەتارا یێ نوی، رووبەرێ جھێ ناڤبری پتری (٨٠ ھکتارا) یە و دھێتە ھژمارتن ئێک ژ مەزنترین جھنشینێن کەڤن یێن کو ھەتا نوکە ل باشوورێ پارێزگەھا دھوکێ و باکوورێ تلسقوف ھاتیە دیتن و گۆت: "جھێ خەتارا ل سەر دەمێ ئاشوریا ناڤەراست کێم بوونەکێ ب خوەڤە دبینیت و رووبەرێ وێ دبیتە نێزیکێ (٥٠) ھکتاران دووڤ دا ل سەردەمێ ئاشوریا نوی رووبەرێ وێ دبیتە نێزیکێ (٨٠) ھکتاران رەنگە (تەمنونە) بیت پایتەختێ ئیقلیمی یێ کو د سەردەمێ (ئەدەد نیراری یێ سێیێ ٨١١-٧٨٣پ.ز) ئێک ژ جھێن گرنک یێن ئاشووریان بوویە".
رێڤەبەرێ شوونوار و کەلەپۆری ل پارێزگەھا دھۆکێ خویا کر کو جھێ خەتارا ل چەرخێ نحاسی یێ کەڤن جھەکێ بەرفرەھـ بوویە رووبەرێ وێ نێزیکێ (٤٠) ھکتاران بوویە، دووڤ دا ل سەردەمێ (نەینەوا ٥) کێمبوونەک ب خوەڤە دیتیە، لێ ل نیڤا ھزارا سێیێ بەرفرەھبوونەکا مەزن ب خوڤە دیتیە و بەردەوام بوویە، ل چەرخێ برونزی یێ ناڤەراست و ل سەردەمێ میتانیان وەک سەنتەرەکێ شارستانی مەزن بوویە رووبەرێ وێ نێزیکێ (٧٠) ھکتاران بوویە.
رێوار محەمەد رەشید
