نێچیرڤان بارزانى بۆ ده‌رچووانى زانكۆ: زانست و زانین، گه‌وره‌ترین هێز و سه‌رمایه‌تانه
ئێواره‌ى ئه‌مڕۆ سێشه‌ممه 7/6/2022 به‌ڕێز نێچیرڤان بارزانى، سه‌رۆكى هه‌رێمى كوردستان، به‌شدارى له ڕێوڕه‌سمى ده‌رچوونى خولى چواره‌مى زانكۆى ئه‌مه‌ریكیى كوردستاندا له دهۆك كرد كه به ئاماده‌بوونى به‌ڕێز مه‌سروور بارزانى، سه‌رۆك وه‌زیرانى هه‌رێمى كوردستان و به‌ڕێزان وه‌زیرى ده‌ره‌وه‌ى عیراق، سه‌رۆكى نێرده‌ى تایبه‌تى UN له عیراق، كونسولى گشتیى ئه‌مه‌ریكا له هه‌ولێر و ژماره‌یه‌ك له وه‌زیران و به‌رپرسانى باڵا به‌ڕێوه چوو.
له ڕێوڕه‌سمه‌كه‌دا سه‌رۆك نێچیرڤان بارزانى وته‌یه‌كى پێشكه‌ش كرد، تیایدا وێڕاى پیرۆزبایى له ده‌رچووان و دایكوباوك و كه‌سوكار و مامۆستایانیان، جه‌ختى له گرنگیى قۆناغى داهاتووى ژیانى ده‌رچووان و ئه‌ركى سه‌ر شانیان له خزمه‌تكردنى وڵات له بواره جیاكاندا كرده‌وه. به‌ڕێزیان هه‌روه‌ها پشتگیرى و به‌رده‌وامیى هاریكاریى خۆى بۆ زانكۆكانى هه‌رێمى كوردستان دووپات كرده‌وه و پشتبه‌ستنى زانكۆكانى به داتا و لێكۆڵینه‌وه‌ى زانستى و ڕۆڵیان له چاره‌سه‌ركردنى كێشه‌كانى ئێستا و داهاتوو له بواره جیاكاندا به پێویست زانى.
ئه‌مه ده‌قى وتارى به‌ڕێز سه‌رۆكى هه‌رێمى كوردستانه:
ده‌رچوویێن هێژا،
مێهڤان و ئاماده‌بوویێن ڕێزدار،
ئێڤارا وه ب خۆشى بیت،
بخێرهاتنا هه‌مى مێڤانێن هێژا دكه‌م، بتایبه‌تى مێڤانێن بیانى یێن كو زه‌حمه‌ت كێشاى و دگه‌ل مه به‌شدارن د ڤێ ڕێوڕه‌سمێدا. بخێرهاتنا هه‌میا دكه‌م، هه‌مى ب خێر بێن، سه‌رچاڤا.
هه‌رگاڤ بۆ هه‌ر ڕێوڕه‌سمه‌كێ ده‌ما ئه‌م تێین بۆ دهۆكێ، دهۆكا ڕه‌نگین، دلێ مه خۆش دبیت. خۆشحاڵین جاره‌كا دى، د ڕێوڕه‌سمه‌كا دى یا ده‌رچوونا قوتابى یێن خۆشتڤى یێن كوردستانێدا ل باژێڕێ دهۆكێ ب دیدارا هه‌وه هه‌میا شاد دبین. هوین هه‌مى گه‌له‌ك ب خێر هاتن.
دڤێ ڕێوڕه‌سما ده‌رچوونا خولا چارێ یا زانكۆیا ئه‌مه‌ریكى یا كوردستانێدا، ئه‌م هه‌مى پێكڤه ب خۆشى و سه‌ركه‌فتنا ڤان قوتابیا شادین. پیرۆزباهیێ ل وان دكه‌ین، پیرۆزباهیێ ل دایكوباب و كه‌سوكار و مامۆستایێن وان یێن هێژا دكه‌ین كو ئه‌ڤرۆ د ڤێ ڕێوڕه‌سمێدا دگه‌ل مه به‌شدارن.
ده‌رچوویێن هێژا..
ب گه‌رمى و ژدل پیرۆزباهى و ده‌ستخۆشیێ ل هه‌وه دكه‌م بۆ ماندیبوون و زه‌حمه‌تا كو هه‌وه د ڕێكا سه‌ركه‌فتنێدا كێشاى. ئه‌ڤرۆ هه‌ر ئێك ژ هه‌وه، چیرۆكه‌كا سه‌ركه‌فتنێ بۆ كوردستانێ تۆمار دكه‌ت. هه‌ر ئێك ژ هه‌وه، جهێ شانازییا مه هه‌میانه. ئه‌م شانازیێ ب هه‌وه دكه‌ین. هوین هیڤییا پاشه‌ڕۆژێ و سه‌ركرده‌یێن پاشه‌ڕۆژێ یێن ڤى وه‌لاتینه. كو ئه‌ز گه‌نجێن وه‌كى هه‌وه دبینم، هیڤى و ئومێدا پاشه‌ڕۆژه‌كا گه‌شتر بۆ ولاتێ مه د وه‌ڕا دبینین. هه‌بوونا هه‌وه، گه‌هشتنا هه‌وه بۆ ڤێ ئاستێ، شادیێ تێخیته دلێ مه هه‌میادا. باوه‌رییه‌كا زێده‌تر بۆ مه درست دبیت ب پاشه‌ڕۆژا ولاتێ مه ل كوردستانێ.
ده‌ما هوین ئه‌ڤرۆ به‌ره‌ڤ قۆناغه‌كا نوى یا كار و به‌رپرسیاریێ گاڤا دهاڤێژن، پێدڤییه هه‌رگاڤ سپاسدار بن بۆ شانسێ كو هه‌وه هه‌ى. سپاسدار بن بۆ باب و باپیرێن هه‌وه، وان ئه‌و شانس نه‌بوویه، لێ ئه‌و شانس دایه هه‌وه. وان خه‌بات و پێشمه‌رگاتى كر. ب گیانێ خۆ، ب خوینا خۆ به‌ڕه‌ڤانى ل ولاتى و ل ئازادییا وه‌لاتى كر، داكو ئه‌ڤرۆ هوین ئازاد بن و بشێن ل ولاتێ خۆ ل زانكۆیێ بخوینن. شه‌ره‌فمه‌ندم ئه‌ڤرۆ ل باژێڕێ دهۆكێ دبینم كو زانكۆیا ئه‌مه‌ریكى یا كوردستانێ، سه‌ركه‌فتیانه سال ب سال به‌ره‌ڤ پێش دچیت و كادرێن باش و ژێهاتى په‌روه‌رده دكه‌ت بۆ ڤى ولاتى. پێدڤییه ب زۆرى و زه‌حمه‌تییا وان بزانن و چ جارا زه‌حمه‌تییا باب و باپیرێن خۆ ژبیر نه‌كه‌ن كو ئازادییا ئه‌ڤرۆ به‌رێ خوین و ڕه‌نج و خه‌باتا وانه، یان شه‌هیدانه كو ئه‌ڤرۆ ئه‌م به‌رهه‌مێ وێ دبینین و ب ئازادى و ب كه‌یفخۆشى پێكڤه ئاهه‌نگا ده‌رچوونا ڤان خۆشه‌ویستا دگێڕین.
هه‌تا نها وان ئه‌ركێ خۆ ب هه‌مى دلسۆزیڤه یێ بجى ئیناى. ئاخ و ئازادى یا ڤى ملله‌تى یا پاراستى. هوین ژى ئه‌ڤرۆ پێدڤییه ب دلسۆزى د هه‌مى وارێن ژیانێدا ده‌ست پاڤێژنه خزمه‌تا ملله‌تێ خۆ و ولاتێ خۆ. ب زانست و زانین و مه‌عریفه‌یا كو هه‌وه بده‌ستڤه ئیناى، پێدڤییه گه‌له‌ك سه‌ركه‌فتنێت مه‌زن تۆمار بكه‌ن، ڕۆلێ خۆ یێ كاریگه‌ر و داهێنه‌ر بۆ ئاڤاكرنا ولاتى و پێشڤه‌برنا جڤاكا كوردستانێ، ببینن.
هوین ئێدى دێ بنه داینه‌مۆیا پێشڤه‌برنا ولاتى. پێدڤییه هوین ببنه هێڤێنێ پێشكه‌فتنا جڤاكى و زانستى و مه‌عریفى. پێدڤییه سیسته‌مێ ڕێڤه‌برنێ و جڤاكێ بۆ ئاسته‌كێ گه‌له‌ك بلندتر ژ یێ ئه‌ڤرۆ ببه‌ن. ئه‌ڤه نه ئه‌ركه‌كێ بساناهى یه، لێ پێدڤییه هوین كۆڵ نه‌ده‌ن و سه‌ركه‌ڤن. هه‌ر وه‌كى چاوا هه‌وه كۆل نه‌دا،
هه‌وه شه‌ڤ و ڕۆژ كرنه ئێك و ب شێوه‌یه‌كێ سه‌ركه‌فتى قۆناغێن خویندنێ ده‌رباز كرن، پێویسته ڤێ قۆناغا دى ژى ده‌رباز بكه‌ن و ب خۆشى و سه‌رفرازى خزمه‌تا ولاتێ خۆ بكه‌ن.
ده‌رچوویێن هێژا..
د قۆناغا نوى یا ژیانێدا، هه‌ر ئێك ژ هه‌وه، د هه‌ر واره‌كیدا ده‌ست ب كارى بكه‌ت، چاڤێ مه یێ ل هیممه‌تا هه‌وه كو هوین خودان ڤیژن بن، باوه‌رى بخۆ، دویربین، پرۆفیشینال، ده‌ستپێشخه‌ر، داهێنه‌ر، بنیاتنه‌ر و به‌رهه‌مدار بن بۆ ڤى ولاتى. ژبۆ بجى ئینانا خه‌ون و خۆزى یێن خۆ، ب ئیراده بن. ب ئیراده بن بۆ پێشڤه‌برنا كوردستانێ، چ جارا كۆل نه‌ده‌ن، به‌ره‌ڤ پاشه‌ڕۆژێ، هیڤى و ئومێدێن ڤى ملله‌تى بگه‌هیننه ئارمانجێ.
ل هه‌رێما كوردستانێ و عیراقێ، گه‌له‌ك هیڤى ب هه‌وه هه‌نه، ولات چاڤه‌ڕێى هه‌وه‌یه و هیڤى دكه‌ت گه‌نجێن زێده‌تر ئه‌ڤ ئه‌ركێ كو لسه‌ر ملێ وان هه‌ى بۆ پاشه‌ڕۆژا ڤى ملله‌تى بجى بینن. پێدڤییه د هه‌مى وارێن ژێرخان، ئابوورى، گه‌شه‌پێدان، زانستى، مه‌عریفى و هه‌مى وارێن دیدا، ببنه پێشه‌نگ و ولاتى به‌ره‌ڤ پێش ببه‌ن. ئێدى جهێ تلییا هه‌وه ب نها و پاشه‌ڕۆژا ولاتێ مه‌ڤه دیار دبیت. ب شێوه‌كێ كاریگه‌ر به‌شدار و ده‌ستپێشخه‌ر بن بۆ ڤه‌دیتنا چاره‌سه‌رییا كێشه و ته‌حه‌دى یێن ئه‌ڤرۆ ل ولاتێ مه هه‌ى، وه‌كى: كێشه‌یێن تێكچوونا كه‌شوهه‌واى، چاوانییا پاراستنا ژینگه‌هێ، كێمبوونا ئاستێ ئاڤێ، بیابانبوونێ، كێشه‌یێن جڤاكى، ئیدارى، سیاسى و هه‌تا دویماهیێ.
ده‌رچوویێن زانكۆیێ ل كوردستانێ و عیراقێ، پێویسته ژ نهاڤه پێشبینییا كێشه و ته‌حه‌دى و ئاریشه‌یێن سبه و پاشه‌ڕۆژێ بكه‌ن. ژ نهاڤه فكر لێ بكه‌ن و هه‌ولا بده‌ن داكو چاره‌سه‌رێن درست بۆ كێشه‌یێن ڤى ولاتى ببینن. هه‌ر ئێك ژى بخوازیت خویندنا خۆ یا بلند بدویماهى بینیت، پێدڤییه ب هه‌مان گیان و باوه‌رییا سه‌ركه‌فتنێ، لسه‌ر هه‌ولدانێن خۆ به‌رده‌وام بیت.
هه‌ر دڤێ ده‌لیڤێدا، من دڤێت هه‌مى لایه‌كى پشتڕاست بكه‌م كو وه‌كى هه‌رگاڤ دێ لسه‌ر پشته‌ڤانییا زانكۆیا ئه‌مه‌ریكى یا كوردستانێ ل دهۆكێ و زانكۆیێن دى یێن كوردستانێ به‌رده‌وام بین. ئه‌م په‌رۆشى پێشڤه‌چوونا زێده‌ترا ئاستێ خویندنێ و فێركرنێ و خویندنا بلندین ل كوردستانێ. هندى ئه‌م بشێین، بۆ پشته‌ڤانییا زانكۆیێ و گه‌نجان، هه‌ر چ ژ ده‌سێ مه بێت، خه‌مساریێ ناكه‌ین و یا پێویسته دێ ئه‌نجام ده‌ین.
هه‌روه‌سا هه‌مى پشته‌ڤانیێ ل هه‌ولا دامه‌زراندنا (ده‌زگه‌ها متمانه‌به‌خشینێ ب پرۆگرام و ناڤه‌ندێن خویندنێ) ل هه‌رێما كوردستانێ دكه‌م. ده‌ستخۆشیێ ل هه‌ولێن و كۆششێن ڕێزدار مه‌سروور بارزانى، سه‌رۆك وه‌زیرێ هه‌رێما كوردستانێ بۆ دامه‌زراندنا ڤێ ده‌زگه‌هێ دكه‌م، هه‌روه‌سا ژى ده‌ستخۆشیێ لێ دكه‌م بۆ ڤیژنا وى یا كو ئه‌ڤ زانكۆیه لسه‌ر هاتیه ئاڤاكرن. هیڤیدارم به‌رده‌وام و سه‌ركه‌فتى بیت. خۆشحالم كو دبینم زانكۆیا ئه‌مه‌ریكى یا كوردستانێ، بها و گرنگى یا دایه زۆربه‌ى وارێن زانستى و مرۆڤى و ئه‌ڤرۆ دڤان ڕێوڕه‌سمادا، ل قۆناغا دویێ ژى بگشتى، (145) ده‌رچوو، دێ باوه‌رناما زانكۆیى وه‌رگرن.
ئه‌ڤ گه‌نجێن عه‌زیز، ب وێ پسپۆڕییا كو ب ده‌ستڤه ئیناى، دێ د گه‌له‌ك وارادا خزمه‌تا ولاتێ خۆ كه‌ن، وه‌كى: ئه‌ندازیارییا بیناسازى، ڕێڤه‌برنا كارى، ئه‌ندازیارییا ئه‌لكترۆنى، په‌یوه‌ندى و گه‌هاندن، ژینگه، ئاى تى، دیزاینا ناڤخۆ، په‌یوه‌ندى یێن نێڤده‌وله‌تى، ڕێڤه‌برنا نه‌فت و گازێ، ئه‌ندازیارییا نه‌فتێ، سیاسه‌تا گشتى و ئاسایش و لێكۆلینێن ستراتیژى. ئه‌ڤه جهێ شانازى و خۆشحالییا مه‌یه.
ئاماده‌بوویێن ڕێزدار..
من دڤێت جاره‌كا دى ته‌ئكیدێ لسه‌ر ڕۆلێ زانكۆیێ بكه‌م بۆ دابینكرنا پێویستى یێن بازاڕێ كارى و هه‌مى وارێن دى یێن كو بۆ پێشئێخشتن و گه‌شه‌پێدانا هه‌ر ولاته‌كى، پێویستن. لسه‌ر ڤێ ئێكێ، پێدڤییه زانكۆ گرنگییه‌كا تایبه‌ت بده‌ته داتا و لێكۆلینێن زانستى و بكه‌ته بنگه‌هه‌كێ سه‌ره‌كى یێ كار و پرۆگرامێ خۆ. بۆ ڤێ چه‌ندێ، پێدڤییه هاریكارى و هه‌ماهه‌نگییه‌كا درست دناڤبه‌را ده‌زگه‌هێن حكوومى یێن په‌یوه‌ندیدار و كه‌رتێ تایبه‌ت و زانكۆیادا هه‌بیت. ئه‌ڤه دێ هاریكار بیت بۆ دانانا پلانێن هه‌نۆكه‌یى و یێن ئاینده‌ى.
ده‌رچوویێن خۆشتڤى..
باشترین سه‌رمایێ هه‌وه، مه‌زنترین هێزا هه‌وه، ئه‌و زانست و مه‌عریفه و پسپۆڕى و تایبه‌تمه‌ندى یه، یێن كو هه‌وه د قۆناغێن خویندنێ بگشتى و خویندنا زانكۆییدا بتایبه‌تى بده‌ستڤه ئیناى. ئه‌ڤه مه‌زنترین سه‌رمایه‌یێ ژیانا هه‌وه‌یه. باشترین وه‌به‌رهێنانا كو دایكوبابێن هه‌وه كرى ئه‌ڤه بوویه. ئه‌وه كو هه‌مى هه‌ول داین و هاریكار و پشته‌ڤان بوون، داكو هوین سه‌ركه‌فتنێ د خویندنا خۆدا تۆمار بكه‌ن. ئێدى ژ ئه‌ڤرۆ وێڤه نۆرا هه‌وه‌یه كو چاكییا وان بده‌نه‌ڤه ب خزمه‌تكرنا ولاتێ خۆ، پێشڤه‌برنا ولاتێ خۆ. ملله‌ت و ولاتێ هه‌وه، موحتاجى هه‌وه‌نه. هوین ب سه‌ركه‌فتن و كار و خزمه‌تێ، دێ دلێ وان و دلێ مه هه‌میا خۆش كه‌ن.
پاشه‌ڕۆژا ئه‌ڤى وه‌لاتى یا د ده‌ستێ هه‌وه‌دا. هه‌روه‌كى چاوا هوین ژ هه‌مى جهـ و ده‌ڤه‌ر و پێكهاتان ل ڤێرێ پێكڤه كۆم بوونه، هوین ژ هه‌ر جهه‌كێ كوردستانێ و عیراقێ هاتبن و هه‌وه زانكۆ بدویماهى ئینا، ب هه‌مان شێوه، پێویسته هه‌وه ڕۆله‌كێ كاریگه‌ر هه‌بیت بۆ پێشڤه‌برنا كولتوورێ پێكڤه‌ژیانێ، ته‌باییێ، لێبوورینێ و هه‌مه‌ڕه‌نگییا هه‌رێما كوردستانێ و عیراقێ.
ب ده‌رچوون و سه‌ركه‌فتنا هه‌وه گه‌له‌ك خۆشحالم. خۆشحالم كو ڤێ ئێڤارێ ل دهۆكا خۆشتڤى، دگه‌ل هه‌وه‌مه. دیسا پیرۆزباهى و ده‌ستخۆشیێ ل هه‌وه دكه‌م. ده‌ستخۆشیێ ل دایكوباب و مامۆستایێت هه‌وه دكه‌م. ده‌ستخۆشى و سپاسییه‌كا گه‌رم ل سه‌رۆكاتى و ڕێڤه‌به‌رییا زانكۆییا ئه‌مه‌ریكى یا كوردستانێ ل دهۆكێ دكه‌م كو ئه‌و ژى ئه‌ڤرۆ به‌شه‌كێ گرنگێ سه‌ركه‌فتنا هه‌وه‌نه. ده‌ستخۆشیێ ل وان دكه‌م و هیڤییا سه‌ركه‌فتنێ بۆ وان دخوازم.
هه‌ر هه‌بن، هه‌ر شاد و سه‌كه‌فتى بن. ب ئانه‌هییا خودێ دێ هه‌ر بینین كو كوردستان ب هه‌وه یا ئاڤه‌دانه. سه‌ركه‌فتى بن. دیسا پیرۆز بیت و ب خێر بێن سه‌رچاڤا.
زۆر سپاس.
