پارتی و یه‌كێتی راگه‌یاندراوێكی هاوبه‌شیان بڵاوكرده‌وه
هەولێر-KDP.info- ئه‌مڕۆ سێشه‌ممه 7 ی 6 ی 2022، شاندی پارتی دیموكراتی كوردستان و یه‌كێتی نیشیمان كوردستان پرسی ده‌ستوور و هه‌ڵبژاردنی په‌رله‌مانی كوردستانیان تاوتوێكرد.
شاندی پارتی پێكهاتبوو لە رێبوار یەلدا ئەندامی مەكتەبی سیاسی پارتی و سەرۆكی شاندی پارتی، خەسرەو گۆران بەرپرسی دەزگای هەڵبژاردنی پارتی، زانا مەلا خالید سەرۆكی فراكسیۆنی پارتی لە پەرلەمانی كوردستان .
شاندی یەكێتیش پێكهاتبوو لە رزگار عەلی كارگێڕی مەكتەبی سیاسی و سەرۆكی شاندی یەكێتی، رزگار حاجی حەمە بەرپرسی مەكتەبی هەڵبژاردنی یەكێتی، زیاد جەبار سەرۆكی فراكسیۆنی یەكێتی و لوقمان وەردی جێگری سەرۆكی فراكسیۆنی یەكێتی لە پەرلەمانی كوردستان و عەلی شوانی ئەندامی مەكتەبی ھەڵبژاردنی یەكێتی.
دوای كۆبوونه‌وه‌ی نێوان هه‌ردوولا، راگه‌یانراوێكی هاوبه‌شیان بڵاوكرده‌وه، ده‌قی راگه‌یاندراو:
رۆژی 7 ى 6 ى 2022، كۆبوونه‌وه‌ی شاندی پارتی دیموكراتی كوردستان و یه‌كێتی نیشتیمانی كوردستان له‌هه‌ولێر سه‌باره‌ت به گفتوگۆ له‌سه‌ر پرسی ده‌ستوور و هه‌ڵبژاردنی په‌رله‌مانی كوردستان وه‌ك دوو پرسی نیشتیمانی به‌ڕێوه‌چوو.
1- هه‌ردوولا هاوڕابوون له‌سه‌ر پێویستی نووسینه‌وه‌ی ده‌ستووری هه‌رێمی كوردستان، بۆ ئه‌م مه‌به‌سته پێویسته ده‌ست به ئاماده‌كاری یاسایی بكرێت.
2- پرسی هه‌ڵبژاردنی په‌رله‌مانی كوردستان و كۆمیسیۆنی هه‌ڵبژاردنه‌كان وه‌ك دوو پرسی نیشتیمانی پێویستییان به گفتوگۆی زیاتر و سازانی سه‌رجه‌م هێزه سیاسییه‌كانی كوردستانه بۆ گه‌یشتن به ڕێككه‌وتنێكی گشتگیر.
3- بڕیاردرا كۆبوونه‌وه‌ی نێوان هه‌ردوولا به‌رده‌وام بێت.
