''دەستەیەک بۆ پەروەردە و خوێندی باڵا دادەمەزرێت''

هەولێر-KDP.info- بڕیارە دەستەیەک بۆ متمانەدان بە پرۆگرامەکانی پەروەردە و خوێندنی باڵا دابمەزرێت و ئەندامێکی لیژنەی پەروەردە و خوێندنی باڵا لە پەرلەمانی کوردستان دەڵێت، دەستەکە ڕۆڵی بەرچاوی دەبێت بۆ کەرتی پەروەردە و خوێندنی باڵا.

گولستان باقی، ئەندامی لیژنەی پەروەردە و خوێندنی باڵا، بە ماڵپەڕی فەرمیی پارتی دیموکراتی کوردستانی ڕاگەیاند: ''لەلایەن سەرۆکایەتیی ئەنجومەنی وەزیرانەوە پڕۆژەیاسایەک ئامادە کراوە و پێشکەشی پەرلەمانی کوردستان کراوە بۆ دامەزراندنی دەستەیەک بۆ متمانەدان بە پرۆگرامەکانی پەروەردە و خوێندنی باڵا، پڕۆژەکە لەبەردەستی لیژنەی پەروەردە و خوێندنی باڵادایە و پێشکەشی لیژنەی یاسایی دەکەین بۆ ئەوەی ئەوانیش تێبینی خۆیان لەسەر پڕۆژەکە دیاری بکەن.''

گولستان باقی ڕوونیشی کردەوە: "ھاوشێوەی دەستەکانی دیکە، دەستەی متمانەدان بە پرۆگرامەکانی خوێندن ڕۆڵی بەرچاوی دەبێت، بەڵام دامەزراندنی دەستەکە مانای ئەوە ناگەیەنێت کە دەبێتە شوێنگرەوەی وەزارەتەکانی پەروەردە و خوێندنی باڵا، چونکە لە زۆر وڵاتی جیھان دەزگای ھاوشێوە ھەیە، بۆ نموونە لە بەریتانیا دەزگایەکی ھاوشێوە ھەیە، هەرکاتێک بڕوانامەیەک گومانی لەسەر بێت، لەلایەن ئەو دەستەیەوە پشتڕاست دەکرێتەوە.''

 

قائید میرۆ