لسەر فەرمانا مەسروور بارزانی ١٦ پڕۆژەیێن دی بۆ قەزا باتیفا دێ ھێنە ئەنجامدان

 زاخۆ -KDP.info- ئەڤرۆ ٤/٦/٢٠٢٢ گوھدار شێخۆ، سەرپەرشتیارێ ئیدارەیا سەربخۆیا زاخۆ، ئەنجامدانا ١٦ پڕۆژیێن خزمەتگوزاری ل سنوورێ قەزا باتیفا راگەھاندن، کو لسەر راسپاردەیا مەسرور بارزانی ب گوژمێ حەفت ملیار دیناران دێ ھێنە ئەنجامدان.

سەرپەرشتێ ئیدارا سەربەخۆ یا زاخۆ، ب ئامادەبوونا بەرێز دکتۆر محەمەد شوکری، سەرۆکێ دەستەیا وەبەرھێنانێ ل حکومەتا ھەرێما کوردستانێ، سەرەدانا قەزا باتیفا کرن و لسەر ڕاسپاردا ڕێزدار جەنابێ مەسرور بارزانی، سەرۆکێ حکومەتا ھەرێما کوردستانێ و ل بەرژەوەندییا گشتییا خەلکێ دەڤەرێ و سنوورێ قەزا باتیفا، رازەمەندییا لسەر ١٦ پرۆژیێن خزمەتگوزاریێن جۆراوجۆر لسەر بودجا گەشەپێدانا ھەرێمێ، ب گوژمێ حەفت ملیار دیناران ھاتە دان و شەش پرۆژە ب گۆژمێ ئێک ملیار دیناران لسەر بودجا ئیدارا سەربەخۆ یا زاخۆ، کو لژێر ئەنجامدانێ یە.

د پەیڤەکێدا شێخۆ دیارکر: ''ھەر بوھستەکا ڤی وەلاتی قوربانییەک بۆ پاراستنا ڤێ ئاخێ یێ ھاتی دان، لەورا دەما مرۆڤ دبینت یێ ئاڤەدان دبیت و بەرەڤ پێش دچیت، ئەڤ یەکەژی ڤەدگەریت بۆ سیاسەتا سەرکەڤتیانە یا حکومەتا ھەرێما کوردستانێ، بتایبەت کابینا نەھێ ب سەرۆکایەتییا ڕێزدار جەنابێ مەسرور بارزانی، کو پیتەدانەکا تایبەت ب سێکتەرێ گەشتیاری دایە، بۆ ھندێ کو ئیدی خەلکێ مە ل جھێن گشتی و گەشتیاری، پتر ھەست بکەن ئەو د ئارامن.''

سەرپەرشتێ ئیدارا سەربەخۆ یا زاخۆ گۆتژی: "حکومەتا کوردستانێ سەرەرایی ھەمی وان گڤاشتن و ئاستەنگیێن دھێنە پێش، بەردەوامە لسەر کاروانێ ئاڤەدانکرن و گەشەکرنا ڕۆیێ ھەمی دەڤەران، بتایبەت سنوورێ ئیدارا سەربەخۆ یا زاخۆ، ژبەر ڤێ چەندێ ژی، دێ ھەول دین ل سنوورێ ھەردوو قەزایان (زاخۆ – باتیفا ) گرنگییەکا تایبەت ب سێکتەران بدین، داکو پتر خزمەتا خەلکێ وێ یێ خۆشتڤی بکین.''

قائید میرۆ