وەزیری تەندروستی بۆ KDP: وەڵامی ھەموو پرسیارەکانی پەرلەمانی کوردستان دەدەینەوە

ھەولێر-KDP.info- وەزیری تەندروستی حکوومەتی ھەرێمی کوردستان دەرەنجامی شاندی وەزارەتی بۆ بەغدا و بڕیارەکان لەوبارەوە ئاشکرا دەکات و دەڵێت، ئەمڕۆ لەبارەی ڕەوشی تەندروستی ھەرێمی کوردستان ئامادەی دانیشتنی پەرلەمانی کوردستان دەبین.

لە لێدوانێکی تایبەتدا، د. سامان بەرزنجی، بە ماڵپەڕی فەرمیی پارتی دیموکراتی کوردستانی ڕاگەیاند: "بۆ گفتووگۆکردن لەسەر ڕەوشی تەندروستی، پەرلەمانی کوردستان بانگھێشتی ئێمەی کردووە بۆ دانیشتنی ئەمرۆ، وەکو ئەرکی خۆمان ئامادە دەبین و وەڵامی ھەموو پرسیارەکان دەدەینەوە بەداتا و زانیاری تایبەت بە کەرتی تەندروستی، چونکە کەرتێکی خزمەتگوزارییە و کارێکی زۆر کراوە".

د. سامان بەرزنجی راشیگەیاند: "پاڵپشتیەکی تەواو ھەیە لەلایەن حکوومەتی ھەرێمی کوردستان و خودی مەسروور بارزانی، سەرۆکی حکوومەتی ھەرێمی کوردستان و سەرۆکایەتی ئەنجوومەنی وەزیران، کە بۆتە ھۆی ئەوەی سەرکەوتنمان بەدەستھێناوە لە دوو ساڵی ڕابردوو و ئێستاش سەرقاڵی چاکسازیکردنین لە سیستەمی تەندروستی".

سەبارەت بە ناوەڕۆکی سەردانی شاندی وەزارتەکەی بۆ بەغداش، د. سامان، گوتی: "باشترین پەیوەندیمان لەگەڵ وەزارەتی تەندروستی عێراق ھەیە و، بۆ ئەوەی وەکو ھەرێمی کوردستان زیاتر سوودمەندبین لەو بڕ و بەشەی کە ئەرکی عێراقە بۆمان دابین بکات، شاندێکمان سەردانی بەغدایان کرد و، یاداشتێکی (٣٢) خاڵیمان پێشکەش کرد و ھەندێک لەو یاداشتە بووە بڕیار، وەکو ھێنان و بردنی دەرمان و پشکی ھەرێم و چاکردنەوەی ئامێرە پزیشکیەکان و، پشکی پارێزگای ھەڵەبجەی خۆشەویستیش دابین بکرێت وەکو پارێزگا و، چەند بابەتێکی تر بوون ھەروەھا ھەندێک خاڵی ‌یاداشتەکەش کاری لەسەر دەکرێت ".

وەزیری تەندروستی گوتیشی: "وەزیری تەندروستی عێراق سەرسامی خۆی بە زۆر لە خزمەتگوزارییەکانی تەندروستی ھەرێمی کوردستان دەربڕیوە بۆ نموونە وەکو ڕەوشی شێرپەنجە ھیوای خواست بەشێک لەو خزمەتگوزارییانە بۆ ھەموو عێراق پەیڕەو بکات".

 

نەشوان بەرزنجی