نێچیرڤان بارزانى پیرۆزبایى له یه‌كێتیى نیشتمانیى كوردستان ده‌كات
ئه‌مڕۆ چوارشه‌ممه 2022/6/1 به‌ڕێز نێچیرڤان بارزانى، سه‌رۆكى هه‌رێمى كوردستان، له په‌یوه‌ندییه‌كى ته‌له‌فۆنیدا له‌گه‌ڵ به‌ڕێز بافڵ جه‌لال تاڵه‌بانى، سه‌رۆكى یه‌كێتیى نیشتمانیى كوردستان، له یادى چل و حه‌وت ساڵه‌ى دامه‌زراندنى یه‌كێتیى نیشتمانیى كوردستاندا، پیرۆزبایى له به‌ڕێزیان و له سه‌ركرایه‌تى و ئه‌ندامان و جه‌ماوه‌رى یه‌كێتى كرد.
سه‌رۆك نێچیرڤان بارزانى وێڕاى ئاما‌ژه‌دان به ڕۆڵى كاریگه‌رى یه‌كێتیى نیشتمانیى كوردستان و سه‌رۆك مام جه‌لال له بزاڤى ڕزگاریخوازیى كوردستاندا، هه‌موو ئه‌و تێكۆشه‌ر و پێشمه‌رگه قاره‌مانانه‌ى به بیر هێنایه‌وه كه له‌پێناو ئازادیى كوردستان و له ڕێزه‌كانى یه‌كێتیدا، خه‌باتیان كردووه و قوربانییان داوه.
هه‌ر له‌م یاده‌دا سه‌رۆك نێچیرڤان بارزانى جه‌ختى له پێویستیى كارى هاوبه‌ش و پێكه‌وه‌یى و ته‌بایى و یه‌كڕیزیى نێوان ته‌واوى لایه‌نه كوردستانییه‌كان كرده‌وه له‌پێناو پاراستنى فیدرالى و قه‌واره‌ى سیاسیى هه‌رێمى كوردستان و مافه ده‌ستوورییه‌كانى گه‌لى كوردستاندا. هه‌ر له‌مباره‌یه‌وه ڕۆڵى یه‌كێتیى نیشتمانیى كوردستانى به گرنگ و كاریگه‌ر له قه‌ڵه‌م دا.
لاى خۆیه‌وه به‌ڕێز بافڵ جه‌لال تاڵه‌بانى، سه‌رۆكى یه‌كێتیى نیشتمانیى كوردستان، سوپاس و پێزانینى خۆى و یه‌كێتیى نیشتمانیى كوردستانى بۆ پیرۆزبایى و په‌یوه‌ندیى به‌ڕێزیان ده‌ربڕى و هه‌وڵه‌كانى سه‌رۆك نێچیرڤان بارزانى له‌پێناو یه‌كڕیزى و كۆكردنه‌وه‌ى لایه‌نه سیاسییه‌كاندا، به‌رز نرخاند.
