بابەکر زێباری: لە ئێستادا ٩٩%ی چەکدارانی داعش عێراقین و بیانی زۆر کەمی کردووە

ھەولێر-KDP.info- راوێژکاری سەربازی سەرۆکی ھەرێمی کوردستان پێی وایە، ھێشتا زەمینە لەبارە بۆ بەھێزبوونی گروپی تیرۆرستی داعش و دەڵێ، داعشی بیانی زۆر کەمە لە عێراق و لە ئێستادا ٩٩%ی چەکدارانی داعش ھاووڵاتی عێراقن.

بابەکر زێباری، راوێژکاری سەرۆکی ھەرێمی کوردستان بۆ کاروباری سەربازی، بە ماڵپەڕی فەرمیی پارتی دیموکراتی کوردستانی راگەیاند: "لە ھەندێک ناوچەی عێراق زەمینە لەبارە بۆ جووڵەی داعش، بەتایبەتی لە ناوچەکانی ناوەڕاستی عێراق، پێشتر زیاتر چەکداری داعشی بیانی تێدابوون، بەڵام ئێستا زیاتر چەکدارەکانی داعش لە عێراق چەکداری ناوخۆیی و ناوچەکەن، لەسەردەمی دەرکەوتنی داعش لە زۆرێک لە وڵاتانی جیھان چەکداری داعش دەھاتنە نێو عێراق ھەتا داعشی یەمەن و شیشانیش ھەبوون لە عێراق بەپێچەوانەوە داعشەکانی ئێستای عێراق ٩٩%ی عێراقین".

راوێژکاری سەربازی سەرۆکی ھەرێم گوتی: "راستە داعش جووڵەی زیادکردووە لە ھەندێ ناوچە، ئەگەر دەرفەت ھەبێت ھێرشی زیاتریش ئەنجامدەدات، چونکە ھێزە ئەمنی و سەربازیەکان لە ئامادەباشیدابن و بەرپەرچی ھەر ھێرشێکی داعش بدەنەوە ئەوە بێگومان داعش ئەو ھێزە نیە بە ئاسانی بتوانێت دەستی خۆی بوەشێنێ، بەپێچەوانەوە سوپا لاوازبێت داعش ھەمیشە ئامادەیی تێدایە بۆ ھێرشکردن و دەرفەت لەدەست خۆی نادات".

بابەکر زێباری ڕوونیکردەوە: "لە ھەندێ ناوچە بۆشایی ئەمنی ھۆکاری زیادبوونی جووڵەی داعشە، ئەو دوو لیوا ھاوبەشەی لەنێوان ھەرێم و بەغدا دامەزراون مەشق و راھێنانیان پێکراوە و ئامادەکراون بۆ پڕکردنەوەی بۆشایی ئەمنی، بەداخەوە ھۆکاری دەست بەکارنەبوونی دوو لیوای ھاوبەش بۆ خەرجنەکردنی میزانیە دەگەڕێتەوە، ئەگەر ئەو ھێزە نوێیە جێگیر بکرێت کاریگەری لەسەر رەوشی ئەمنی دەبێت".

 

قائید میرۆ