بۆ ئەو ھێزانەی دەخرێنە سەر وەزارەتی پێشمەرگە ھەر دەرماڵەیەک ھەبێت بۆیان خەرج دەکرێت
ھەولێر-KDP.info- جێگری سوپاسالاری پێشمەرگە بۆ ئۆپەراسیۆنەکان گوتی، تا ئێستا ٢٠ لیوای ھێزی پێشمەرگە یەک خراون و ئێستا کار بۆ یەکخستنی دوو لیوای دیکەش دەکرێت و ئەوانەی دەخرێنە سەر وەزارەتی پێشمەرگە ھەر دەرماڵەیەک ھەبێت، بۆیان خەرج دەکرێت.
جێگری سوپاسالاری پێشمەرگە بۆ ئۆپەراسیۆنەکان، لیوا قارەمان کەمال، بۆ ماڵپەڕی فەرمیی پارتی دیموکراتی کوردستان گوتی: ''ئەو ھێزانەی دەخرێنە سەر وەزارەتی پێشمەرگە ھەر جۆرە دەرماڵەیەک لە وەزارەت ھەبێت بۆ ئەوانیش خەرج دەکرێت و یەکخستنی ھێزی پێشمەرگەش بەردەوامە و ئێستا خەریکی ئەوەین دوو لیوای دیکەش یەک بخرێن و بکەونە سەر وەزارەتی پێشمەرگە.''
جێگری سوپاسالاری پێشمەرگە بۆ ئۆپەراسیۆنەکان گوتیشی: ''یەکخستنی ھێزی پێشمەرگە بەردەوامە و تاوەکوو ئێستا ٢٠ لیوا یەک خراون و کەوتوونەتە سەر وەزارەتی پێشمەرگە و ئێستا خەریکین دوو لیوای دیکەش یەک بخرێن و ئەوانیش بکەونە سەر وەزارەتی پێشمەرگە و پڕۆسەکەش بەردەوامە.''
لیوا قارەمان کەمال گوتیشی: ''ھەر ھێزێک بخرێتە سەر وەزارەتی پێشمەرگە، ھەر دەرماڵەیەک لە وەزارەتی پێشمەرگە ھەبێت بۆ ئەو پێشمەرگانەش خەرج دەکرێت، ھاوشێوەی پێشمەرگەکانی سەر بە وەزارەتی پێشمەرگە، بەڵام دەستکاریی مووچەکانیان ناکرێت.''
بڵند ئیبراھیم
