پەکەکێ ب مۆشەکان ھێرشی پەخشێ ڕادیۆ و تەلەڤزیۆنا دھۆک کر
__2022_05_24_h19m37s20__HK.jpg)
دھۆک-KDP.info- پەخشێ ڕادیۆ و تەلەڤزیۆنا دھۆک ل چیایێ بێخێری ل ھنداڤی گەلیێ زاخۆ ئەڤرۆ رۆژا سێشەمبی ٢٤/٥/٢٠٢٢ کەفتە بەر ھێرشەکا مۆشەکی یا چەکدارێن پەکەکێ، د ئەنجام دا زیانێن ماددی ب ئاڤاھی و دەزگەھێن بنگەھێ پەخشێ ڕادیۆ و تەلەڤزیۆنا دھۆک کەفتینە.
ناڤەندا خانی یا رەوشەنبیری و ڕاگەھاندنێ کو ڕادیۆ و تەلەڤزیۆنا دھۆک ب سەر ڤەنە د بەیاننامەکێ دا ئەڤ ھێرشا تێکدەرانە ئیدانەکر و د بەیانناما ناڤەندا ناڤھاتی دا ھاتیە: "ئەم ڤێ کریارا تێکدەرانە یا تیرۆرستی یا کو ئەڤرۆ رۆژا سێشەمبی ٢٤/٥/٢٠٢٢ ژ لایێ چەکدارێن پەکەکێ ڤە ب ھاڤێتا مۆشەکان ل سەر پەخشێ ڕادیۆ و تەلەڤزیۆنا دھۆک ل چیایێ بێخێری ل ھنداڤی گەلیێ زاخۆ ھاتیەکرن رسوا و شەرمزار و مەحکوم دکەین، ئەم ئاگەھداریا ئەنجامدەرێن وێ کریارێ دکەین، کو ئەڤ بنگەھێ پەخشیێ میدیایی نیشانەکا شارستانیەتێ و پێشکەفتنا ھەرێما کوردستانێ یە و خزمەتا مللەتێ کوردستانێ و دوزا رەوایا وێ دکەت، چ گەفێ و مەترسیێ ل سەر چ لایەنا دروست ناکەت و چ بھانە بۆ ئارمانجگرتنا وێ نینە، ئەڤ جورە کریارە دەنگ و رەنگ و پەیاما مە ناڕاگریت، ھیڤیە پەکەکە د سیاسەتا خوە یا شاش دا بجنە ڤە و گۆرەپانا خوە یا خەباتێ بزانن و ل وێرێ چالاکیێن خوە بکەت، کوردستانا باکوور رووبەرەکێ مەزنترە و باژێرێن وێ پترن و مرۆڤێن وێ بووشترن و چیایێن وێ بلندترن و گەلیێن وێ کوورترن و خەلکێ وێ یێ پێدڤی ئازادیێ یە، ئەڤ جورە کریارە دژی سازیێن ھەرێما کوردستانێ بتنێ خزمەتا دۆژمن و داگیرکەرێن کوردستانێ دکەن، دەم ھاتیە پەکەکە دەستی ژ ھەرێما کوردستانێ ھەلینیت و قەستا وی جھی بکەن یێ پێدڤی ب خەبات و رزگاریێ.
رێوار دھۆک
