ھەشتەمین کەرنەڤالێ رۆژا پارێزگەھبوونا دھۆکێ دێ ھێتە گێڕان
دھۆک-KDP.info-پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ ئاشکرا کر کو ل ژێر درووشمێ (کەرنەڤال بۆ خزمەتا خەلکی) یە، رێڤەبەریا گشتی یا رەوشەنبیری و ھونەری ل پارێزگەھا دھۆکێ ب پشتەڤانیا (پ.د.عەلی تەتەر) پارێزگارێ دھۆکێ دێ ھەشتەمین کەرنەڤالی ب ھەلکەفتا ٥٣ سالیا پارێزگەبوونا دھۆکێ ل رۆژا ئەیینی ٢٧/٥/٢٠٢٢ ل پارکا نەورۆز یا د ناڤ سەنتەرێ باژێرێ دھۆکێ دا گێڕیت.
حەسەن فەتاح، پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو ھەمە رەنگی و پێکڤەژیانا ل پارێزگەھا دھۆکێ دا ھەیی دێ د کەرنەڤالێ ناڤھاتی دا یا دیار بیت و گۆت: "کەرنەڤالێ ھەشتی یێ رۆژا پارێزگەھبوونا دھۆکێ دێ ژ چەندین بڕگێن جۆراوجۆر پێکھێت ژوان کەرنەڤال دێ ل رۆژا ٢٧ی گۆلانێ ل دەمژمێر ٥:٠٠ ئێڤاری ب بەریکانێن ماراسۆنێ دەستپێکەت و ل دەمژمێر ٨:٠٠ شەڤێ کۆنسێرتا ستران و مۆزیکێ دێ ھێتە گێڕان".
ناڤھاتی ئاماژە دا وێ چەندێ کو د چارچۆڤێ وان بەرھەڤیێن بۆ ھەشتەمین کەرنەڤالێ رۆژا پارێزگەھبوونا دھۆکێ ھاتینەکرن دێ بەریکانێن ماراسۆنی ھێنە ئەنجامدان و جلوبەرگێن فلکلۆری یێن کوردی و پرۆژێن رێڤەبەریێن حکومەتێ و برگەیێن کەلتۆری دێ ھێنە نیشادان و گۆت: "دخوازین خەلکێ پارێزگەھا دھۆکێ ب شێوەیەکێ بەرچاڤ پشکداریێ د کەرنەڤالی دا بکەن ژ بەر کو کەرنەڤال بۆ خزمەتکرنا خەلکی یە".
رێوار محەمەد رەشید
