ھۆلا محەمەد عارفێ جزیری ل دھۆکێ ھاتە ڤەکرن
دھۆک –KDP.info- پشتی ل سالێن بۆری ژ ئەگەرێ شۆرتەکێ کارەبێ ھۆلا محمەد عارفێ جزیری ل باژێڕێ دھۆکێ ھاتیە سۆتن، ل سالا بۆری ب بڕیارا سەرۆکێ حکومەتا ھەرێما کوردستانێ دەست ب نووژەنکرنا وێ ھاتەکرن و ئەڤرۆ رۆژا چارشەمبی ١٨/٥/٢٠٢٢ د رێورەسمەکی دا ب ئامادەبوونا (پ.د.عەلی تەتەر) پارێزگارێ دھۆکێ و چەندین ھونەرمەند و ھونەردوستان ھۆلا ناڤھاتی ھاتە ڤەکرن.
پ.د.عەلی تەتەر، پارێزگارێ دھۆکێ د پەیڤەکێ دا ئاشکرا کر کو ئەڤرۆ ئێک ژ ھۆلێن گرنگێن باژێرێ دھۆکێ پشتی ژ قووناغا نووژەنکرنا ب دووماھی ھاتی دووبارە ھاتە ڤەکرن و دخوازین دووبارە ھونەرمەند و رەوشەنبیر و جڤاک ب شێوەیەکێ گشتی مفایی ژ ھۆلا محەمەد عارفێ جزیری ببینن و ببیتە جھێ ئەنجامدانا چالاکیێن جوراوجور، ھەر کەسەکێ د سالێن بۆری دا د ھەلکەفتێن جوداجودا دا سەرەدانا ڤێ ھۆلێ کربیت بیرھاتن یێن دگەل ڤێ ھۆلێ ھەین و گۆت: "دەمێ بابەتێ نووژەنکرنا ھۆلا ناڤھاتی دگەل سەرۆکێ حکومەتا ھەرێما کوردستانێ ھاتیە بەحسکرن ئێکسەر و بێ گیربوون رازەمەندیا خوە بۆ نووژەنکرنا ھۆلێ دیارکر و د ھەمان دەم دا دووپاتی ل وێ چەندێ ژی ھاتەکرن کو ھۆل ددەمێ خوە دا ب دووماھی بھێت، سۆپاسیا سەرۆکێ حکومەتا ھەرێما کوردستانێ و ھەر کەسەکێ رۆل د نووژەنکرنا ھۆلا محەمەد عارفێ جزیری دا ھەیی دکەم".
پارێزگارێ دھۆکێ د بەردەوامیا پەیڤا خوە دا دیار کر کو رەنگە ل سالێن بۆری ژ بەر شەرێ دژی تیرۆرستێن داعش و ل ڤان دو سالێن دووماھیێ ژی ژ بەر بەلاڤبوونا ڤایرۆسێ کۆرۆنایێ کو کۆمبوون وخرڤەبوون قەدەغەبوون حکومەتا ھەرێما کوردستانێ وەکو پێدڤی گرنگی ب لایەنێ کلتۆری و ھونەری و رەوشەنبیری نەدابیت، بەلێ ژ نوکە وێڤە ئەم د وێ باوەرێ داینە کو دێ گرنگیەکا باش ب لایەنێن ناڤھاتی ھێتەدان، بەلێ سەرەرایی پشتەڤانیا حکومەتا ھەرێمێ ل سەر سازیێن کەرتێ تایبەت و کۆمپانی و سەرمایەداران ژی پێدڤیە خوە ل ڤان لایەنێن گرنگ بکەنە خودان و پشتەڤانیێ ل بزاڤا کلتۆری و ھونەری و رەوشەنبیری بکەن، ژ بەر کو ئەم پێکڤە د ڤێ ئاخا پیرۆز دا دژین و ژیان و ھەبوونا مە ب کوردستانێ ڤە یا گرێدایە و ھەکە کێم و کاسی و گلە و گازندە ھەبن ژی دڤێت ئەم ب خوە چارەسەر بکەین.
ھەژی گۆتنێ یە کو پشتی رێورەسمێن ڤەکرنا ھۆلا محەمەد عارفێ جزیری ل باژێرێ دھۆکێ ب دووماھی ھاتین، شانۆگەریا (دبیت بھێت) ژ دەرھێنانا (نێچیرڤان کەکو)ی ھاتە نیشادان و بۆ دەمێ دو رۆژێن دی ژی دێ ل ھەمان جە ھێتە نیشادان، ئەڤ شانۆگەریە بەرھەمێ رێڤەبەریا ھونەرێ شانۆیێ و کۆما ماسک بوو.
رێوار محەمەد رەشید
